Putinin KTMT ilə bağlı imzalayacağı yeni sənəd Ermənistanı qorxuya salıb
Rusiya prezidenti Vladimir Putin KTMT çərçivəsində tərəfdaş dövlətlərin statusunu müəyyən edən sənəd imzalamağı planlaşdırır.
1news.az xəbər verir ki, imzalanması gözlənilən digər bir sənədə görə iştirakçı dövlətlərə yalnız ölkə liderinin deyil, baş nazirlərin də zirvə görüşlərinə göndərilməsinə də icazə verir.
Sənəddə deyilir ki, protokolların KTMT sammitində imzalanması məqsədəuyğundur.
Erməni mətbuatı imzalanmaq üçün hazırlanan ikinci sənədin Ermənistanın konstitusiya dəyişikliyinə uyğunlaşdırıldığını yazır:
“Çünki Ermənistanda ölkə rəhbəri baş nazirdir. Buna görə də bu sənəd vacibdir, başqa tərəfdən, bəzən Moskva baş nazir ilə Ermənistan prezidentinin münasibətlərində süni kontrast yaradaraq, manipulyasiyalara əl atır”.
Erməni mətbuatı Putinin bu sənədlə Azərbaycanın KTMT-yə yolunu açdığını da qeyd edir və bundan narahatlığını ifadə edir:
“Son vaxtlar Azərbaycanın KTMT-də mümkün üzvlüyü barədə danışıqlar aktivləşib. Əlbəttə ki, real siyasət baxımından bu, çox real bir ssenaridir. Bundan başqa, Azərbaycan, əslində, artıq KTMT-də iştirak edir, hər halda, Qazaxıstan və Belarus onun maraqlarını fəal şəkildə lobbiləşdirir və bu baxımdan Azərbaycanın KTMT-yə üzv olması çox böyük əhəmiyyət daşımayacaq.
Ancaq Azərbaycanın KTMT-də tam hüquqlu üzvü olmasa da, ən azı tərəfdaş dövlət olması söhbəti var. Bu yaxınlarda Belarus prezidenti Aleksandr Lukaşenko bunu açıq şəkildə söylədi”.
P.Sultanova
