Paşinyana göstərilən “ayı xidməti” dəhşətli nəticələrə gətirə bilər - erməni mətbuatı

Ermənistanın Mülki Aviasiya Komitəsinin rəhbəri Tatevik Revazyan dövlət büdcəsinin vəsaiti hesabına bahalı avtomobil alıb.

1news.az erməni mətbuatına istinadla xəbər verir ki, komitənin gənc xanım rəhbərinin yeni avtomobili "Toyota Camary" markasındandır.

Erməni mətbuatı, həmçinin yazır ki, baş nazirin həyat yoldaşı Anna Akopyan dövlət məmuru olmadığı və ictimai funksiyaları yerinə yetirmədiyi halda, İsveçrəyə işgüzar səfərə gedəcəyini elan edir:

“Çox məntiqli suallar yaranır: Anna Akopyanın xaricə səfərləri hansı vəsait hesabına baş tutur və o, bu vəsaitlərin hardan əldə olunduğu, nə qədər pul sərf etməsinin hesabatını verir?

Cəmiyyətin müəyyən bir hissəsi tərəfindən bu kimi ədalətli suallar səslənərkən fərqli məzmunlu cavablar olur: “Yaxşı edib. Kimin nəyinə lazımdır?”. Anna Akopyan kimin qarşısında hesabat verirsən, necə hesab edirsənsə, elə də et”. “Nə oldu, Serjin pullarını saymırdınız, yoxsa ki, onun sizi necə qarət etməsi xoşunuza gəlirdi?".

Və bütün cavablar bu məzmundadır".

Qeyd edilib ki, cəmiyyətin böyük hissəsi mövcud hakimiyyətə sərhədsiz azadlıq verir: “Bu, Nikol Paşinyanın “serjləşməsi” üçün vətəndaşların könüllü olaraq ona və komandasına verdiyi kart-balansdır ki, bununla da inqilab ideyası tam şəkildə qiymətdən düşür. Nəyə görə Paşinyana hər şeyi edə bilmək “mükafatı” verilir?”.

Məqalədə deyilir ki, Ermənistanda yaşanan aprel hadisələri erməni xalqının on ildən çoxdur cinayətkar rejimə qarşı əzmkarlıq mübarizəsinin ən son nöqtəsi idi. Uzun illik mübarizə bir şəxsə deyil, korrupsiyaya, ədalətsizliyə qarşı idi. Və indiki vəziyyət  davam edərsə, Paşinyan və komandasına göstərilən belə “ayı xidməti” dəhşətli nəticələrə gətirib çıxara bilər.

P.Sultanova