Asif Şirəliyev II Avropa Oyunlarına rəsmi dəvət aldı – FOTO
Super Kateqoriyalı Güləş Hakimimiz Asif Şirəliyev 2019 II Avropa Oyunlarına Dünya Güləş Birliyi tərəfindən rəsmi dəvət alıb.
1news.az-ın məlumatına görə, ikinci dəfə keçiriləcək qitənin ən böyük yarışı 21-30 İyun 2019-cu il tarixlərində Belarusiyanın paytaxtı Minskdə baş tutacaq. Burada 50 ölkədən 4000-dən çox idmançı 15 idman növündə mübarizə aparacaqdır.
Güləş idman növündə Super (I-S) kateqoriyalı hakim Asif Şirəliyev bu günlərdə Dünya Güləş Birliyi tərəfindən yeganə olaraq Azərbaycanımızı II Avropa Oyunlarında ləyaqətlə təmsil etmək üçün rəsmi dəvət alıb. Asif Şirəliyev 2007-ci ildən Dünya Güləş Birliyinin beynəlxalq dərəcəli hakimdir.
2015 və 2016-cı illərdə Azərbaycan Respublikası Gənclər və İdman Nazirliyinin idman-təqvim ilinin yekununa həsr olunmuş keçirdiyi sorğuya əsasən bu illərin ən yaxşı hakimi nominasiyasının qalibidir.
Qeyd etməliyik ki, Asif Şirəliyev son 7 ildə Dünya Güləş Birliyinin ən titullu yarışlarına dəvət alır və ölkəmizi şərəflə təmsil edir. Təkcə 2018-ci ili misal gətirsək - Dünya Çempionatı, Avropa Çempionatı, Daxili çempionatlar və s. hakim kimi təmsil edib. O, həmçinin Gürcüstan Çempionatına 2 dəfə Baş Hakim, Krasnoyarskda 3-qat olimpiya, 6-qat dünya və 6-qat Avropa çempionu Buvaysar Saytiyevin şərəfinə keçirilən sərbəst güləşçilərin U-15 beynəlxalq yarışa DGB nümayəndəsi kimi öz imzasını atıb.
Şirəliyev 2016-cı il Rio Yay Olimpiya Oyunlarına qəbul edilsə də, son bir neçə gün ərzində yarışlara çağrılmadı.
Amma bu dəfə Dünya Güləş Birliyinin İdarə Heyəti və Birliyin Hakimlər Kollegiyası yeni strategiya və Asif müəllimin göstərdiyi böyük əməyə görə, Şirəliyevə etimad göstərmiş və vətənimizi təmsil etmək üçün ona Minskə bilet sifariş verib. II Avropa Oyunları 2020-ci il Tokio Yay Olimpiya Oyunları üçün ən əsas imtahanlardan biridir ki, Şirəliyev bu mərhələni uğurla keçib. Qeyd etmək lazımdır ki, Asif Şirəliyevin sahib olduğu Super (I-S) kateqoriyasında daha 3 hakimimiz var.
Xatırladaq ki, qitənin ən nüfuzlu 2015 I Avropa Oyunları - 12 iyun - 28 iyun 2015-ci ildə 1-ci dəfə Azərbaycanın paytaxtı Bakı şəhərində keçirilib. Yarışlarda Avropanın 50 ölkəsinin 10 000 idmançısı 30 idman növündə mübarizə aparıb. Yarışlarda idmançılar 253 dəst medal uğrunda yarışıb. Yarışlarda medal cədvəlində ilk sıranı Rusiya Federasiyasının idmançıları tutub. Onlar 79 qızıl, 40 gümüş və 45 bürünc, ümumilikdə 164 medal qazanıb. İkinci sıranı isə ev sahibi Azərbaycan idmançıları tutub. Yarışlara 289 idmançı ilə qatılan Azərbaycan 21 qızıl, 15 gümüş və 20 bürünc, ümumilikdə 56 medal qazanıb.
1news.az
