"The Washington Post": Erməni siyasətçi 52 günlük aclıq aksiyasından sonra həbsxanada ölüb
“The Washington Post" nəşri "Haynews” saytının rəhbərliyində təmsil olunan, həmçinin "Erməni qartalları: Vahid Ermənistan" partiyasının sədr müavini Mqer Yeqiazaryanın həbsdə keçirdiyi uzun müddətli aclıq aksiyasından sonra vəfat etməsinə dair məlumat dərc edib.
1news.az xəbər verir ki, məlumat “Erməni siyasətçi həbsxanada 52 günlük aclıq aksiyasından sonra vəfat edib” başlığı ilə yayılıb.
Qeyd edilib ki, Ermənistanda kiçik bir siyasi partiyanın lideri təxminən iki aya yaxın həbsxanada aclıq aksiyası keçirib.
“51 yaşlı Yeqiazaryanın 52 günlük aclıq aksiyasından sonra yanvarın 26-da həbsxanada keçinib.
Nəşr xatırladıb ki, Yeqiazaryan ötən ilin yayında yaradılmış siyasi partiyanın vitse-prezidenti olub. O, dekabrın 4-də həbs edilib və hakimiyyət orqanlarında işə düzəltməklə bağlı rüşvət almaqda ittiham edilib.
Lakin jurnalist və siyasətçi ittihamları rədd edib və tutulduqdan bir gün sonra aclıq aksiyasına başlayıb.
P.Sultanova
