"168 Jam": Həmsədrlərin bəyanatı Paşinyanı dalana dirənmiş vəziyyətə salıb

Dağlıq Qarabağda təcili olaraq Ermənistan Təhlükəsilik Şurasının iclasının keçirilməsi zərurəti ATƏT-in Minsk qrupu həmsədrlərinin sonuncu bəyanatından sonra yaranıb.

1news.az xəbər verir ki, bu barədə Ermənistanın “168 jam” nəşri yazıb.

Məlumatda deyilir ki, yığıncağın gündəliyi barədə rəsmi olaraq heç nə açıqlanmasa da, bu qərarın həmsədrlərin bəyanatından sonra verildiyi aydındır.

Xatırladaq ki, ATƏT-in Minsk qrupunun həmsədrlərinin bir neçə gün əvvəl verdikləri bəyanat Paşinyanın Azərbaycanın işğal edilmiş ərazilərində yaradılmış separatçı rejimin danışıqlar prosesinə qoşulmasına dair təklifinə cavab oldu. Vasitəçilər tərəfləri mövcud vəziyyətdə dəyişiklik yarada biləcək açıqlamalardan və hərəkətlərdən, gələcək danışıqlar üçün şərtlər irəli sürməkdən və digər tərəfin razılığı olmadan formata dəyişikliklər tələb etməkdən və aktiv hərbi döyüşləri bərpa etmək çağırışından yayınmağa səsləyiblər. Əlbəttə ki, bu, birbaşa Paşinyana ünvanlanmış mesaj idi.

“168 jam” yazır ki, bu bəyanatdan sonra Ermənistan rəhbərliyi əslində dalana dirənmiş vəziyyətdə qaldı:

“Bir tərəfdən, Nikol Paşinyan Dağlıq Qarabağın danışıqlarda iştirakına dair bəyanatından imtina edə bilməz, digər tərəfdən isə o, Qarabağın iştirakının müzakirə olunmayacağı danışıqlara birbaşa qatıla bilməz.

Bu məsələlər Nikol Paşinyanı Dağlıq Qarabağda təcili olaraq Təhlükəsizlik Şurasının iclasını çağırmağa məcbur edib. İclasdan sonra Azərbaycana və həmsədr ölkələrə hansı mesaj göndəriləcəyi məlum olacaq.

Digər tərəfdən, bu, Azərbaycan rəhbərliyi ilə görüşündən əvvəl Paşinyanın müəyyən təəssürat yaratmaq cəhdidir”.

P.Sultanova