“ "ANİMAFİLM" in əks-sədası” Praqada - FOTO
Martın 23-də Çexiyanın paytaxtı Praqada “ANİMAFİLM” I Bakı Beynəlxalq Animasiya Festivalının əks-sədası” adlı tədbir keçirilib.
1news.az-a “ANİMAFİLM”dən verilən məlumata görə, məqsəd təşkilatçıların festivalın nəticələrinə bir daha nəzər salmaq, növbəti festivaldan danışmaq və ən əsası, Azərbaycan animasıyasını tanıtmaq olub.
Tədbir "OLIEL Company" və Azərbaycanın Çexiyadakı səfirliyinin dəstəyi ilə Praqanın “Kino Pilotů” kinoteatrında baş tutub.
Tədbirdə ən yaxşı əcnəbi və Azərbaycan cizgi filmləri nümayiş etdirilib, xaricdə ilk dəfə olaraq “Azərbaycan animasiyası” kitabı təqdim edilib. Azərbaycanla yanaşı bir sıra xarici ölkələrdən də qonaqların iştirak etdiyi toplantıda əsas iştirakçılar Çexiya animasiyası mütəxəssisləri olub.
“ANİMAFİLM” festivalının direktoru Rəşid Ağamalıyev çıxışında qeyd edib ki, bu tədbir ilk növbədə Azərbaycan və Çexiya animasiyası sahəsində münasibətləri daha da yaxınlaşdırdı və mədəniyyətlərimiz arasında birbaşa dialoq yaratdı.
Hazırda Rusiyada çalışan animasiya ustadı, rejissor Cahangir Süleymanov və Almaniyadan Azərbaycanda ən çox “Tıq-Tıq xanım” cizgi filminin rejissoru kimi məşhurlaşmış animasiya ustadı Məsud Pənahi xüsusilə fərqləniblər.
Tədbirin gedişində bu rejissorların çıxışlarından sonra onların cizgi filmləri nümayiş etdirilib.
“ANİMAFİLM” I Bakı Beynəlxalq Animasiya Festivalının qalibi, “OSKAR” mükafatına namizəd “Late Afternoon” (“Günortadan sonra”) da daxil olmaqla mükafat almış Azərbaycan, Rusiya, İran və Almaniya cizgi filmləri Çexiyada ilk dəfə nümayiş etdirilib. Filmin rejissoru Louise Bagnall İrlandiyadan tədbirə İnternetlə qatılaraq deyib ki, “Late Afternoon”un Oskar mükafatına təqdim olunması onun tamaşaçılarının sayını xeyli artırmaq fürsətidir.
Tədbirin Azərbaycan animasiyası adlı ilk hissəsində ən tanınmış Azərbaycan animasiya filmləri nümayiş etdirilib, sonra “Azərbaycan animasiyası” kitabının təqdimatı olub.
“Əks-səda”nın qonaqlarını Azərbaycanın milli şirniyyatları – paxlava, şəkərbura gözləyirdi. Bu jest ilə ANİMAFİLM komandası əziz bayramımız olan Novruz günlərində Azərbaycanın qonaqpərvərliyini bir daha nümayiş etdirdi.
XATIRLATMA
Çoxları yəqin 19-21 oktyabr 2018-ci il tarixlərində Bakı şəhərində keçirilən “ANİMAFİLM” I Bakı Beynəlxalq Animasiya Festivalını unutmayıb. Həmin festival ilk dəfə keçirildiyinə baxmayaraq müvəffəqiyyətlə başa çatdı. Festivala dünyanın 63 ölkəsindən 480 film, 15 ssenari təqdim edilmişdi. Festivalın proqramı çərçivəsində öz sözünü demiş tanınmış animasiya ustaları “ustad dərsləri” və “ReAnimasiya” sərgisi keçirildi və müxtəlif ölkələrin cizgi filmləri, retrospektiv filmlər nümayiş etdirildi, uşaqlar üçün animasiya vorkşopları və kukla tamaşası təşkil edildi. Əminliklə demək olar ki, bu festival Azərbaycanın mədəniyyət tarixində bir iz buraxdı.
İKİNCİ FESTİVAL
2-ci ANİMAFİLM Bakı Beynəlxalq Animasiya Festivalı 18-20 oktyabr 2019-cu il tarixlərində Azərbaycanın paytaxtı Bakı şəhərində keçiriləcək. Festival üç gün ərzində uşaqlar və böyüklər üçün çəkilmiş onlarla yerli və xarici animasiya filmlərini təqdim edəcək. Təşkilatçıların məqsədi yerli və xarici tamaşaçıları, peşəkarları sevindirəcək, həmçinin Azərbaycanda animasiya sənətinin inkişafını təşviq edəcək illik tədbirin yaradılmasıdır.
1news.az
