Nigar Arpadarai Al Jazeera verilişində: “Azərbayan Ermənistan ərazisində döyüşmür” – VİDEO
Azərbaycan Milli Məclisinin deputatı Nigar Arpadarai Əl-Cəzirə telekanalının Dağlıq Qarabağ münaqişəsi zonasında gərginliyin artmasına həsr olunmuş xəbər proqramının qonaqlarından biri olub.
Proqramdakı müzakirələr əsasən cəbhədəki gərginliyin səbəbləri və böhrandan çıxış yolları ətrafında aparılıb.
Nigar Arpadarai qeyd edib ki, münaqişənin hazırkı kəskinləşməsi Ermənistan tərəfinin Azərbaycanın mülki əhalisinə və hərbi obyektlərinə qarşı uzunmüddətli silahlı təxribatlarının nəticəsidir. Və bunlar yalnız son vaxtlar deyil, 30 ildir baş verir.
Məhz Ermənistanın uzun illərdir Azərbaycan ərazilərinin 20% -ni işğal altında saxladığını, silahlı təcavüz və Azərbaycan əhalisinin etnik təmizlənməsi nəticəsində onlara nəzarət etdiyini deyən Nigar Arpadarai, münaqişə nəticəsində bir milyondan çox azərbaycanlı qaçqın və məcburi köçkünün olduğunu da diqqətə çatdırıb:
“Bu gün işğal davam edir və bu fakt çoxsaylı beynəlxalq sənədlərdə, xüsusən də BMT Təhlükəsizlik Şurasının Ermənistan qoşunlarının Azərbaycanın işğal olunmuş ərazilərindən çıxarılmasına çağıran dörd qətnaməsində öz əksini tapıb” deyən millət vəkili, erməni tərəfinin uzun illərdir ki, həmin qətnamələrin tələblərinə məhəl qoymadığını söyləyib.
Nigar Arpadarai, həmçinin son illərdə Ermənistanın siyasi rəhbərliyinin Yaxın Şərqdən olan erməni mənşəli insanları buraya yerləşdirərək Dağlıq Qarabağın qanunsuz məskunlaşdırılması siyasətindən bəhs edib.
Yerevandan olan bir müzakirə iştirakçısının Ermənistan Silahlı Qüvvələrinin Dağlıq Qarabağla heç bir əlaqəsi olmadığını şərhinə cavab olaraq Nigar Arpadarai, Ermənistanın Baş nazirinin həyat yoldaşı Anna Akopyanın əlində avtomat silahla Qarabağda hərbi formada çəkdirdiyi fotoları, eləcə də Dağlıq Qarabağda olan Ermənistanın müdafiə nazirinin fotoşəkilləri nümayiş etdirib.
Millət vəkili təmas xəttindən 100 km məsafədə Azərbaycanın Naftalan şəhərində bir gün əvvəl Ermənistan Silahlı Qüvvələrinin mərmisinin dağıtdığı evin fotolarını da göstərib. Bildirib ki, həmin evin dağıdılması zamanı ikisi məktəbli olmaqla eyni ailədən 5 nəfər həyatını itirib:
“Azərbaycan Ermənistan ərazisində döyüşmür, Azərbaycan sərhədini və vətəndaşlarını qoruyur” deyən Nigar Arpadarai, erməni tərəfinə müraciət edərək deyib: “Əgər sülh istəyirsinizsə, Azərbaycan torpaqlarını azad etməyə başlayın”.
Müzakirəyə ATƏT-in Minsk qrupundakı vasitəçilərdən biri olmuş keçmiş Amerika diplomatı Metyu Brayza da qatılıb. O da öz növbəsində münaqişə zonasında vəziyyətin gərginləşməsinin hazırkı mərhələsindən narahatlığını dilə gətirib, lakin tezliklə tərəfləri danışıqlar masasına qaytarmağın mümkün olacağına inandığını bildirib.
Yelena Ostapenko
