Prezident İlham Əliyev Ağdamın işğaldan azad olunması münasibətilə Azərbaycan xalqını təbrik edib
“Əziz həmvətənlər, mən sizi Ağdam rayonunun işğaldan azad edilməsi münasibəti ilə ürəkdən təbrik edirəm”.
1news.az xəbər verir ki, bunu Azərbaycan Respublikasının Prezidenti İlham Əliyev Azərbaycan xalqına müraciətində deyib.
“Əziz ağdamlılar, siz artıq köçkün deyilsiniz. Siz doğma dədə-baba torpağınıza qayıdacaqsınız. Ağdam rayonunun işğaldan azad olunması noyabrın 10-da imzalanmış üçtərəfli bəyanatın nəticəsidir. Mən dəfələrlə demişdim ki, Qarabağ münaqişəsinin həlli həm siyasi həm də hərbi yollarla mümkündür. Biz uzun illər ərzində bu məsələni siyasi yollarla həll etməyə çalışırdıq. Ancaq bütün dünya gördü ki, məhz Ermənistanın mövqeyinə görə bu məsələ öz həllini tapmayıb. Məsələnin hərbi yollarla həll edilməsi bizim qanuni hüququmuz idi, bu hüququ beynəlxalq normalar tanıyır, bu hüquq bizə BMT nizamnaməsi tərəfindən verilib. Hər bir ölkə özünü müdafiə edə bilər və biz də özümüzü müdafiə etmişik. Ağdam rayonunun işğaldan azad olunması tarixi hadisədir. Deyə bilərəm ki, işğal olunmuş rayonların arasında əhalinin sayına görə Ağdam ən böyük rayondur. İşğaldan əvvəl Ağdam rayonunda 143 min insan yaşayırdı, hal-hazırda Ağdam rayon sakinlərinin sayı 204 min nəfərdir. Rayonun 73 faizi işğal edilmişdir və bizim nəzarətimizdə olan son illər ərzində böyük quruculuq işləri aparmışıq. Quzanlı kəndinə qəsəbə statusu verdik və Quzanlını faktiki olaraq Ağdam rayonunun mərkəzinə çevirdik. Mənim göstərişimlə Quzanlıda sosial obyeklər, infrastruktur və sənaye müəssisələri yaradılmışdı.
1news.az
