Deputat: “Prezident mövqeyini çox qəti və kəskin şəkildə ifadə etdi”
Xəbər verdiyimiz kimi, Prezident İlham Əliyev ötən gün Abşeron Rayon Mərkəzi Xəstəxanasının yeni inşa edilən binasında yaradılan şəraitlə tanışlıqdan sonra Azərbaycan Televiziyasına müsahibə verib.
Müsahibəsində bir çox məqamlara toxunana dövlət başçısı məmurları sərt şəkildə tənqid edib. Prezident bildirib ki, Fövqalədə hallar naziri Kəmaləddin Heydərov, Dövlət sərhəd xidmətinin rəisi Elçin Quliyev, Mərkəzi Bankın sədri Elman Rüstəmov, Azərbaycan Avtomobil Yolları Dövlət Agentliyinin sədri Saleh Məmmədov, AZAL-ın rəhbəri Cahangir Əsgərov, Dövlət Gömrük Komitəsinin sədri Səfər Mehdiyev ona müraciət edərək təmsil etdikləri qurumların Şuşada nümayəndəliklərinin açılması ilə bağlı icazə istəyiblər. Əvəzində isə Prezidentin ciddi iradına və tənqidi nə tuş gəliblər. Bəs görəsən dövlət başçısının bu xəbərdarlıqları nəyə işarədir?
Məsələ ilə bağlı 1news.az-a danışan Milli Məclisin deputatı Elman Nəsirov bildirib ki, dövlət başçısı müsahibəsində bir sıra olduqca önəmli məsələlərə diqqəti cəlb etdi.
“Ölkə rəhbərinin dövlət idarəçilik fəlsəfəsinin qayəsini təşkil edən çox mühüm bir yanaşma var. Ölkə Prezidenti dəfələrlə qeyd edir ki, mənim əsas amalım güclü Azərbaycan dövləti qurmaq və xalqıma ləyaqətlə xidmət etməkdir. Hər zaman qeyd edir ki, o, xalqın bir nömrəli xidmətçisidir və bütün məmurlar xalqın xidmətçisi olmalıdır və onlar xalqa ləyaqətlə xidmət etməlidir. Belə olduğu təqdirdə onları daha böyük irəliləyişlər gözləyir, yeni yüksəliş gözləyir, əksi halda isə onlar cəzalandırılacaqlar.
Son bir neçə ildə həm mərkəzi icra hakimiyyəti, həm də yerli icra hakimiyyəti orqanlarında həyata keçirilən həbslər dediklərimizi bir daha təsdiq edir. Cənab Prezident dünənki çıxışında da konktret ünvanlar göstərdi, konkret qurumların adlarını çəkdi ki, onların xalqa xidməti ilə bağlı problemlərdən bəhs elədi. Eyni zamanda konkret ünvanlar göstərərək tənqidi mövqeyini bildirdi ki, məmurlar artıq Şuşa uğrunda mübarizəyə başlayıblar, Şuşada yeni ofislər tikmək, hasarlama işləri həyata keçirmək, özləri üçün şərait yaratmaq istəyirlər. Bunlar qəbul edilməzdi və cənab Prezident də mövqeyini çox qəti və kəskin şəkildə ifadə etdi. Hesab edirəm ki, cənab Prezidentin bu məsələni geniş ictimaiyyətə çatdırması onu göstərir ki, həmin məmurlar ölkə Prezidentinin son dərəcə kəskin tənqidindən nəticə çıxarmasalar bu, onların fəaliyyəti ilə bağlı çox ciddi problemlərin yaranmasına səbəb olacaq”.
Qafar Ağayev
