Ceyhun Bayramov: “Ermənistandan gələn bəyanatlar bir sıra hallarda ziddiyət təşkil edir”

“Ermənistanda daxili-siyasi vəziyyətdə kifayət qədər gərginlik mövcuddur” .

1news.az xəbər verir ki, bunu xarici işlər naziri Ceyhun Bayramov jurnalistlərə açıqlamasında deyib.

O bildirib ki, ona görə Ermənistandan bir sıra hallarda gələn bəyanatlar ziddiyət təşkil edir.

“Məsələn, müşahidə edilir ki, hansısa pozitiv mesaj verildi və ya bunu hərkəs müsbət qarşılayır ki, Ermənistandan pozitiv mesaj gəldi. Üstündən qısa müddət keçir, başqa bir mesaj verilir, həmin verilən mesaj əvvəl mesajla ziddiyət təşkil edir. Ona görə də bu məsələ ilə bağlı son fikir söyləmək bir qədər tezdir” .

“Düşünürük ki, Ermənistan tərəfi də bunu anlamalıdır, başa düşməlidir ki, uzun illər ərzində Ermənistan tərəfindən həyata keçirilən təcavüz siyasəti ona heç bir uğur gətirmədi” - deyə, C.Bayramov əlavə edib:

“Çünki biz bu gün Ermənistanın demoqrafik vəziyyətə baxsaq, Ermənistandakı cəmiyyətdaxili sarsıntıya baxsaq, "COVİD-19" pandemiyasının yaratdığı fəsadlar və dövlətin onlara qarşı gücsüz olduğuna baxsaq, görəcəyik ki, orada problemlərin sayı olduqca çoxdur. Hesab edirəm ki, həmin problemlərin kökündə 30 il bundan əvvəl əsası qoyulmuş qonşulara dair aparılan təcavüz siyasəti durur.

Ona görə görə düşünürəm ki, Ermənistanın siyasi rəhbərliyi, Ermənistanda siyasi qərarların qəbul olunmasında məsul olan şəxslər ilk olaraq məsuliyyətli davranmalı, yalnız bir-iki dar şüarlarla deyil, daha geniş müstəvidə məsələyə nəzər salsalar, öz ölkərinin, xalqlarının gələcəyini fikirləşsələr müsbət addımlar qaçılmazdır” .