Aqil Məmmədov: Prezident hər zaman açıqlamalarında öz mövqeyini açıq-aşkar bildirir

Azərbaycan Respublikasının Prezidenti İlham Əliyev yanvarın 12-də yerli televiziya kanallarına müsahibə verib. Dövlət başçısı jurnalistlərin müxtəlif məzmunlu suallarını cavablandırıb. Dövlət başçısı Azərbaycan və Ermənistan arasında münasibətlər, müharibədən sonra Ermənistanın təxribatları, ordu quruculuğu, Azərbaycan iqtisadiyyatı, koronavirus pandemiyası və digər məsələlərlə bağlı önəmli mesajlar verib.

Məsələ ilə bağlı 1news.az-a danışan Milli Məclisin deputatı Aqil Məmmədov deyib ki, Prezident hər dəfə açıqlamalarında, səfərləri zamanı öz mövqeyini açıq-aşkar bildirir.

“Ermənistanla Azərbaycan arasında müharibədən sonra qalmış problemlərin həlli ilə əlaqədar da məsələlərə toxunur. Cənab Prezident hər zaman Azərbaycan və Ermənistan arasında məsələlərin sülh yolu ilə həllini çalışıb, lakin müharibədən öncəki dövrlərə nəzərə salsaq görərik ki, müharibənin başlanmasına səbəb Ermənistan tərəf olub. ATƏT-in Minsk qrupunun fəaliyyətsizliyi də müharibənin başlanmasına gətirib çıxardı. Azərbaycan Ordusu öz gücünü həm Ermənistana, həm də onların havadarlarına göstərdi. Göründü ki, Azərbaycan problemlərini öz gücünə həll etməyə qadir olan bir ölkədir. Müharibə dövründən sonrakı məsələlərə gəldikdə isə, müharibə dövründən sonra da cənab Prezident vurğuladı ki, Ermənistan tərəf bu qərəzli münasibətlərə, düşmənçilik siyasətinə son qoymalıdır və bu vərəqi bağlamalıdır”.

"Müharibə bitəndən sonra Azərbaycan və Ermənistan arasında 4 görüş keçirilib" deyə, deputat əlavə edib:

"Ermənistan rəhbərliyi görüşlərdə verdiyi sözlərə əməl etməyərək təxribatlara davam etdirir. İlham Əliyev Hadrut səfərində bildirdi ki, Azərbaycan Ordu quruculuğu işlərinin post-müharibə dövründə də davam etdiyini, diqqətdə saxlayır. Bu istiqamətdə uğurlu addımlar atılır, yeni komando briqadalar yaradılır. Ermənistan tərəfdən Azərbaycan ərazi bütövlüyünə hansısa təhdid olarsa, o zaman 44 günlük Vətən Müharibəsində olduğu kimi yeni də öz cavablarını alacaqlar”.

A.Məmmədov deyib ki, dövlət başçısı ötən gün yerli televiziya kanallarına verdiyi müsahibədə bir çox məsələlərə toxundu.

"Prezident jurnalistin sualına cavabında "Biz o müharibəni ləyaqətlə, kişi kimi, beynəlxalq humanitar normaları pozmadan aparmışıq. Mən dəfələrlə demişəm, erməni tərəfdən dinc əhali arasında itki az olub. Olan qurbanlar da yalnız müharibədə iştirak edən dinc vətəndaşlar olub. Erməni tərəfi isə alçaqcasına hücumlar edib, bizim şəhərlərimizi daim bombalayıb. Təkcə Tərtərə 16 min mərmi düşüb. Təsəvvür edin, kiçik bir şəhər və 16 min mərmi. Bəs Gəncə, bəs Şuşa, “Skad”lar, “İskəndər”lər!" dedi. Dövlət başçısının bu cavabı ilə Azərbaycan və Ermənistan arasında nə qədər fərqin olduğunu göstərdi. Azərbaycan Ordusu öz ərazilərini işğaldan edərkən belə dinc əhalini hədəf almadı, ancaq Ermənistan bütün beynəlxalq hüququ, müharibə qanunlarını pozaraq dinc əhalini hədəf aldı. Bu da onların nə qədər vandal olduğunu bir daha göstərdi. Azərbaycan isə hər dəfə humanist addım ataraq hərbi əsirləri belə geri qaytardı".

Deputat bildirib ki, 2020–ci ildə dünyanı ağuşuna alan koronavirus pandemiyası ilə mübarizədə də Azərbaycan çevik reaksiya verdi.

“Cənab Prezident müsahibədə bununla bağlı məsələlərə də münasibət bildirdi. Cənab Prezident, “Azərbaycan o ölkələrdəndir ki, hesab edirəm, bu çətin sınaqdan şərəflə çıxır. MDB məkanında birinci ölkə idik ki, vaksinasiyaya start verdik” bildirdi. Azərbaycan pandemiya ilə mübarizə etsə də heç bir sosial layihəni dayandırmadı”.