Polad Bülbüloğlu Portuqaliya Respublikasının Rusiya Federasiyasına yeni təyin edilmiş Səfiri qəbul etmişdir - FOTO
Cari ilin 6 iyun tarixində Səfir Polad Bülbüloğlu Portuqaliya Respublikasının Rusiya Federasiyasına yeni təyin edilmiş Səfiri xanım Madalena Fişeri onun xahişi ilə qəbul etmişdir.
Görüşdə ölkəmizin Səfiri həmkarını təyinatı münasibətilə təbrik etmiş və ona uğurlar arzulamışdır. Bundan əlavə, Rusiya Federasiyasında akkreditə edilmiş diplomatik korpusun duayeni qismində fəaliyyəti, Moskvada təşkil edilən çoxsaylı görüş və mədəni tədbirlər barədə qarşı tərəfi məlumatlandırmışdır.
Ölkəmizin Portuqaliya ilə münasibətləri haqqında söhbət açan Polad Bülbüloğlu ikitərəfli əlaqələrin, xüsusilə turizm, mədəniyyət və təhsil sahələrində inkişafı üçün geniş imkanların olduğunu qeyd etmiş, bunun üçün əməli addımların atılmasının, o cümlədən qarşılıqlı rəsmi səfərlərin həyata keçirilməsinin, Azərbaycan Milli Məclisində olduğu kimi Portuqaliya parlamentində də ölkəmizlə dostluq qrupunun təsis edilməsinin zəruriliyini önə çəkmişdir. Eyni zamanda iki ölkə arasında ticarət dövriyyəsinin artırılması istiqamətində müvafiq tədbirlərin görülməsinin də vacibliyini bildirmişdir.
Xanım Madalena Fişer Polad Bülbüloğlu tərəfindən səsləndirilən təklifləri qəbul edərək, ölkəsinin Azərbaycanla əməkdaşlığın dərinləşdirilməsində maraqlı olduğunu söyləmişdir. Beynəlxalq təşkilatlar çərçivəsində əməkdaşlığın önəmini vurğulayan xanım Səfir, ölkələrimizin BMT çərçivəsində irəli sürdükləri namizədliklərə qarşılıqlı əsasda dəstəyin verilməsinin əhəmiyyət kəsb etdiyini qeyd etmişdir.
Azərbaycanlı diplomat həmkarını Ermənistan-Azərbaycan münaqişəsi, onun tarixi, aparılmış danışıqlar prosesi, BMT Təhlükəsizlik Şurasının məlum 4 qətnaməsi və digər beynəlxalq təşkilatlar çərçivəsində münaqişə ilə bağlı qəbul edilmiş çoxsaylı sənədlərin mahiyyəti haqqında məlumatlandıraraq, Prezident, Ali Baş Komandan İlham Əliyevin rəhbərliyi ilə müzəffər ordumuzun Vətən müharibəsində qazandığı parlaq qələbə haqda danışmış, Azərbaycanın öz suveren torpaqları naminə vuruşduğunu, beynəlxalq hüququn, haqq və ədalətin ölkəmizin tərəfində olduğunu Madalena Fişerin diqqətinə çatdırmışdır. Bundan əlavə, münaqişəyə son qoymuş məlum üçtərəfli Bəyanatın müddəaları və postmünaqişə dövrü, eyni zamanda azad olunmuş ərazilərimizdə sürətlə aparılan genişmiqyaslı bərpa və yenidənqurma işləri barədə də məlumat vermişdir.
Görüşdə regionda baş verən proseslər və maraq doğuran digər məsələlər ətrafında fikir mübadiləsi aparılmışdır. Bu kontekstdə Polad Bülbüloğlu Ukraynadakı vəziyyətlə əlaqədar Azərbaycanın rəsmi mövqeyini həmsöhbətinin diqqətinə çatdırmışdır.
Sonda portuqaliyalı qonağa Azərbaycanın milli baş örtüyü olan kəlağayı, Heydər Əliyev Fondu tərəfindən nəfis şəkildə çap edilmiş “Zəfər salnaməsi” və “Qarabağ işğaldan əvvəl və sonra” kitabları hədiyyə edilmişdir.
Xanım Fişer maraqlı və məhsuldar görüşə görə Səfir Polad Bülbüloğluna təşəkkürünü bildirmişdir.
