“Azərbaycan İnvestisiya Şirkəti”nin investisiya portfeli 12% artıb
“Azərbaycan İnvestisiya Şirkəti” Açıq Səhmdar Cəmiyyətinin (AİŞ) 31 dekabr 2021-ci il tarixinə olan maliyyə hesabatlarının Beynəlxalq Maliyyə Hesabatı Standartlarına uyğun Müstəqil Auditi həyata keçirilib.
1news.az xəbər verir ki, biznes proseslərinin təkmilləşdirilməsi vasitəsilə əməliyyat effektivliyinin artırılması, şirkətdə risklərin idarə olunması və komplayns nəzarətinin əsaslı təşkili, layihələrin qiymətləndirilməsi üzrə ikili nəzarətin tətbiqi, maliyyə və vergi uçotu hesabatlığının təkmilləşdirilməsinin nəticəsi olaraq şirkət hesabat dövrünü uğurla başa vurub.
AİŞ-in uğurlu fəaliyyəti nəticəsində şirkətin xərcləri optimallaşdırılıb, əsas investisiya portfeli və sabit-gəlir portfeli üzrə gəlirlilik göstəriciləri artıb.
Hesabat dövrü ərzində şirkətin investisiya portfeli 12%, sabit gəlir portfeli isə 16% artıb. Belə ki, 2021-ci il ərzində faiz gəlirləri ötən illə müqayisədə 28% yüksəlib. Şirkətin son 2 il ərzində əldə etdiyi xalis mənfəət 11, 8 mln. manat təşkil edib.
AİŞ-in 31.12.2021-ci il tarixinə hazırlanmış maliyyə hesabatı nüfuzlu beynəlxalq audit şirkəti olan “PricewaterhouseCoopers” (PWC) audit edilib.
Qeyd edək ki, "Azərbaycan İnvestisiya Şirkəti" ASC Azərbaycan Respublikası Prezidentinin "İnvestisiya Fəaliyyətinin Təşviqi üzrə Əlavə Tədbirlər haqqında" 2006-cı il 30 mart tarixli Sərəncamı ilə yaradılıb. AİŞ-in əsas məqsədi öz vəsaiti hesabına və digər investorları cəlb etməklə Azərbaycanın kommersiya müəssisələrinə müddətli investisiya qoyuluşları etmək və qeyri-neft sektorunun inkişafına töhfə verməkdir.
1news.az
