Serhan Aktunc: “Şimali Kiprdə Azərbaycandan turistlərin çox olacağını gözləyirik”
“Təəssüf ki, Şimali Kipr Türk Cümhuriyyətinə səfər edən Azərbaycan vətəndaşlarının sayı azdır".
1news.az xəbər verir ki, bunu ŞKTC-nin Turizm, Mədəniyyət, Gənclik və Ətraf Mühit Nazirliyinin müşaviri Serhan Aktunç Bakıda keçirilən mətbuat konfransında deyib.
"Üç dövlət bir millət olaraq kədərimiz də, sevincimiz də bir olun. Bu baxımdan qardaşlarımızla münasibətlərimizi daha da dərinləşdirmək istəyirik. Pandemiyadan öncə 2019-cu ildə Şimali Kiprə cəmi 6 min Azərbaycan vətəndaşı səfər edib. Münasibətləri nəzərə alsaq, bu çox kiçik bir rəqəmdir".
S.Aktunc deyib ki, 19 apreldən yenidən Şimali Kiprə səfərlər bərpa olunacaq.
“Biletlərin qiymətinin daha uyğun olması nəzərdə tutulur. Böyük ehtimalla aviareyslər Bakıdan Antalyaya oradan da Şimali Kiprə olacaq”.
O qeyd edib ki, 2023-2024 ilində Azərbaycandan turistlərin çox olacağını gözləyirik.
“Ən böyük istəyimiz 2011-ci ildən əvvəl Şimali Kiprə səyahət edən turist sayına çatmaqdır. Eyni zamanda Azərbaycandan olan tələbələrin də sayı bizim üçün yetərli deyil. Tələbələrin sayının artması üçün də lazımlı addımları atacağıq”.
