Politoloq: “Bu, Azərbaycanın ən yeni tarixində ən güclü diplomatik qələbəsidir”

Avqustun 16-da BMT Təhlükəsizlik Şurası ermənilərin yaşadığı Azərbaycanın Qarabağ bölgəsini Ermənistanla birləşdirən Laçın yolunun “bağlanmasından” sonra yaranan “humanitar böhranı” müzakirə etmək üçün təcili iclas çağırıb.

Azərbaycan Respublikasının BMT-dəki daimi nümayəndəsi Yaşar Əliyev iclasda çıxış edərək Ermənistanın davamlı dezinformasiyasından, beynəlxalq ictimaiyyəti manipulyasiya etmək və çaşdırmaq üçün apardığı kampaniyadan danışıb.

Azərbaycan dövlətinin bu məsələ ilə bağlı mövqeyi barədə məlumat verib.

Məsələ ilə bağlı 1news.az-a danışan Gənc Demokratlar İnstitutunun sədri, politoloq Yeganə Hacıyeva bildirib ki, Ermənistan tərəfi 44 günlük Vətən Müharibəsindən sonra məğlubiyyətin acısını beynəlxalq təşkilatlarda Azərbaycana qarşı beynəlxalq təyziqlər təşkil etməklə çıxmağa çalışır.

"Son 10 ay ərzində Laçın yolu ilə bağlı beynəlxalq dezinformasiya kampaniyalarının Azərbaycana təsir etmədiyini gördükdən sonra bunu BMT TŞ müzakirəyə çıxarmaqla nail olmağa çalışıb. Bu, Azərbaycanın ən yeni tarixində ən güclü diplomatik qələbəsidir. Ermənistanın BMT Təhlükəsizlik Şurasında təşəbbüs qaldırdığı bu müzakirəsi aylardır davam edən emosional şantaj elementli manipulyasiya kampaniyalarının müşayəti baş tutsa da Azərbaycanın media diplomatiyası, diplomatik və digər rıçaqları ilə növbəti dəfə uğursuzluğa düçar oldu".

"Bununla bağlı Azərbaycan Xarici İşlər Nazirliyi bəyanat da yaydı" - deyə, politoloq əlavə edib:

"Sözügedən BMT-nin Təhlükəsizlik Şurasının Qarabağdakı vəziyyəti müzakirə edən iclası ilə bağlı bəyanatda Ermənistanın yalanları hüquqi əsas kimi təqdim etmək cəhdləri ifşa olundu , emosional şantaj elementlərinin reallığla heç bir əlaqəsi olmadığı sübut olundu. Ermənistan və ümumerməni lobbisinin 10 aya yaxındır müxtəlif sahələrdə: beynəlxalq insan haqqları təşkilatları, beynəlxalq siyasi təşkialtlar, beynəlxalq məhkəmələr və s. insansiyalarda təşkil etdiyi aktivlərin təsir etmədiyinə əmin olduqdan sonra bu cür addım atdı. Buna görə də BMT Təhlükəsizlik Şurası Azərbaycan vətəndaşı olan etnik ermənilərin yaşadığı Qarabağ bölgəsini Ermənistanla birləşdirən Laçın yolunun “bağlanmasından” sonra yaranmış “humanitar böhranı” müzakirə etmək üçün təcili iclas çağırdı. Lakin təcili iclas zamanı məlum oldu ki, Ermənistan tərəfi beynəlxalq ictimayyətin diqqətini manipulasiya etmək üçün fake məlumatlarlar, dezinformasiyalar yaymağa çalışır".

Y.Hacıyeva bildirib ki, sözügedən müzakirə zamanı ölkəmizə qarşı aqressiv reallığı əks etdirməyən ritorikadan istifadə edən ölkələr oldu.

"Məsələn Fransadan nümayəndə olaraq iştirak edən diplomat çıxışından əvvəl Azərbaycan tərəfini salamlamadı. Sadəcə Ermənistan tərəfini salamlayaraq çıxışa başladı. Bu diplomatiyada yanlış və qəbuledilməz addımdır. Fransız diplomatın bu davranışı ölkəsinin Azərbaycana qarşı qərəzli mövqeyinin bir daha sübutu idi. Rəsmi Ermənistan təbliğatının elementlərini təkrarlayan Fransa, Laçın dəhlizi ilə hər iki istiqamətdə nəqliyyatın qeyd-şərtsiz bərpasına çağırışı özü də qərəzli idi, çünki yol humanitar imkanlar üçün açıqdır. Britaniya təmsilçisi həmçinin, Ermənistanla Azərbaycan arasında danışıqları alqışladığını da bildirdi".

"Onu da qeyd edim ki, Azərbaycanın BMT-dəki nümayəndəsi Yaşar Əliyev Ermənistanın dırnaqarası soyqırım iddialarını qətiyyətlə rədd edib" - deyə, o, əlavə edib:

"Ermənistanın işğalçı, siyasi riyakarlıqla məşğul dövlət olduğunu da vurğulayan diplomat bu dezinformasiya kampaniyasını Azərbaycanın ərazi bütövlüyü və süvernliyinə qarşı məsuliyyətsiz bir addım adlandırdı. Azərbaycan Qırmızı Xaç Komitəsi vasitəsilə Qarabağdakı erməniləri bütün zəruri məhsullarla təmin etməyi təklif etsə də erməni tərəfi bundan imtina edib. Qeyd edim ki, Qarabağdakı ermənilər Azərbaycan sakinləridir və Azərbaycan hökuməti onların lazımı yaşayış standartlarını təmin etmə prinsipinə sadiqdir. Laçın dəhlizi adlandırılan yol Azərbaycanın suveren ərazisindədir və heç bir ekstraterritorial statusa malik deyil”.