Azərbaycan bütün tərəfdaşlarla qarşılıqlı-faydalı münasibətləri qoruyub saxlayır
"Cənub qonşumuz İranla olan anlaşılmazlıqlar aradan qalxır".
1news.az xəbər verir ki, bunu Milli Məclisin deputatı Könül Nurullayeva deyib.
"Ötən gün sərhəddə dövlət başçıları arasında keçirilən tarixi görüş münasibətlərdə yeni səhifənin açılması kimi dəyərləndirilməlidir. Təəssüf ki, İran Prezidenti helikopter qəzasında dünyasını dəyişdi. Təsadüfi deyil ki, helkopterin sərt eniş etməsi barədə məlumat yayıldıqdan sonra Prezident İlham Əliyev buna reaksiya verən ilk dövlət başçısı oldu. Dövlət başçımız qonşu, dost və qardaş ölkə olaraq Azərbaycanın hər cür dəstək göstərməyə hazır olduğunu bəyan etdi".
Deputat bildirib ki, Rəsmi Bakı qarşıdan gələn dövrdə də İranla kitərəfli əlaqələri inkişaf etdirmək istiqamətində siyasət yürüdəcək.
"Məlumdur ki, Tehrandakı səfirliyimizə hücum edən şəxs cəzalandırıldı. İyuldan səfirliyimiz yeni binada fəaliyyət göstərəcək. Bir sözlə, yerin tapılması, uyğunlaşdırma işləri vaxt tələb edib.
Ötən günki görüş isə prezidentlərin sərhəddə ilk görüşü idi. Araz çayı üzərində inşa edilmiş “Xudafərin” hidroqovşağının istismara verilməsi və “Qız Qalası” hidroqovşağının açılış mərasimində dövlət başçıları çox vacib mesajlar verdilər. Liderlər birgə müzakirələri yenidən nəzərdən keçirdilər. Hər iki ölkənin əsas hədəfi birlik və dostluğun sarsılmazlığını təmin etmək, münasibətlərə kölgə salmaq cəhdlərini zərərsizləşdirməkdən ibarətdir. Azərbaycan Prezidentinin bəyan etdiyi kimi, bölgənin inkişafı regiondakı ölkələrdə yaşayan xalqların iradəsi ilə təmin olunmalıdır: “Qeyri-regional ölkələrin bizim işlərimizə müdaxiləsi qəbuledilməzdir. Əgər kimsə - buradan minlərlə kilometr uzaqlıqda yerləşən ölkələrin rəhbərləri bu bölgədə hər hansı bir nəticə əldə etmək istəyirlərsə, bizimlə danışsınlar. Yersiz və lazımsız müdaxilə bu günə qədər heç bir səmərə verməyib və verməyəcək””.
"Ağbənd yolu regionları birləşdirən əsas nəqliyyat-tranzit yollarından biri olacaq. Oradan Türkiyəyə və İran vasitəsilə Fars körfəzinə yüklərin daşınması həyata keçiriləcək. Qarşıdan gələn dövrdə dəmir yolunun da çəkilməsi nəzərdə tutulur" - deyə, K.Nurullayeva əlavə edib:
"Verilən mesajlardan bir daha aydın oldu ki, Bakı və Tehran əməkdaşlığı bütövlükdə bölgənin sabitliyi üçün önəmli faktordur. Bunu nəzərə alaraq, hər iki ölkə bölgənin sabitliyi, gələcək təhlükəsizlik tədbirlərinin gücləndirilməsi üçün bütün beynəlxalq təşkilatlarda bir-birinə bundan sonra da dəstəyi davam etdirəcək. Beləliklə, Azərbaycanla İran arasında yeni mərhələ açıldığını əminliklə söyləmək olar".
