ICESCO-nun baş katibi: Azərbaycanla tərəfdaşlığı genişləndirmək üçün əlimizdən gələni edəcəyik
"Bu tədbirin keçirilməsi üçün göstərdiyi dəstəyə görə Prezident İlham Əliyevə, Birinci vitse-prezident Mehriban Əliyevaya, eləcə də gənclər və idman naziri Fərid Qayıbova təşəkkür edirəm".
1news.az AZƏRTAC-a istinadən xəbər verir ki, bu sözləri ICESCO-nun baş katibi Səlim Əl-Malik Şuşa şəhərində keçirilən "By Youth for Youth" (Gənclər tərəfindən gənclər üçün) Beynəlxalq Forumundakı çıxışı zamanı deyib.
O, gələcəkdə Azərbaycanla tərəfdaşlığın genişləndirilməsini nəzərdə tutduqlarını bildirib: "Bunun üçün əlimizdən gələni edəcəyik. Bu il Azərbaycanda keçiriləcək COP29 tədbirində də iştirak etmək istəyirik".
Baş katib Şuşa şəhərinə səfər etdiyi üçün xoşbəxt olduğunu söyləyib: "Burada olmaq möhtəşəmdir. Biz dünyada sülhü qorumaq üçün əlimizdən gələni etməliyik".
Qeyd edək ki, forum öz işinə 26-27 iyunda Bakı şəhərində gənclərin iştirakı ilə panel müzakirələr və təqdimatlarla davam edəcək. Dünyanın dörd qitəsindən gələn iştirakçılar Azərbaycanın zəngin multikultural tarixi və mədəniyyəti, ali təhsil müəssisələri ilə tanış olacaqlar.
