ABŞ Prezidenti Tramp ticarət tarifləri ilə bağlı yeni fərman imzaladı
ABŞ Prezidenti Donald Tramp, Ağ Evdə keçirilən tədbirdə ölkənin xarici ticarət siyasətində mühüm dəyişiklik edəcək yeni fərmanı imzalayıb.
1news.az xarici KİV-lərə istinadən xəbər verir ki, sənəd, digər ölkələrə qarşılıqlı tariflərin tətbiq olunmasını nəzərdə tutur.
Tramp çıxışında bu günü "qurtuluş günü" adlandıraraq, ABŞ-ın vətəndaşlarının və vergi ödəyicilərinin 50 ildən artıqdır ki, istismar edildiyini və bunun artıq sona çatacağını bildirib. "Bu, bizim iqtisadi müstəqillik bəyannaməmizdir", – deyə o vurğulayıb.
ABŞ Prezidenti, yeni qərarın ölkədə daha çox istehsal, güclü rəqabət və istehlakçılar üçün daha aşağı qiymətlərə yol açacağını qeyd edib. O, xroniki ticarət kəsirlərini təkcə iqtisadi problem deyil, həm də milli təhlükəsizlik üçün təhdid hesab etdiyini bəyan edib.
Yeni qaydalara əsasən, sabahdan etibarən ABŞ digər ölkələrə qarşı qarşılıqlı tariflər tətbiq edəcək. Trampın sözlərinə görə, minimum əsas tarif dərəcəsi 10 faiz olaraq müəyyənləşdirilib. Bundan əlavə, bu gecə yarısından etibarən ABŞ-a idxal olunan avtomobillərə 25 faiz gömrük rüsumu tətbiq ediləcək.
Bu qərar ABŞ-ın beynəlxalq ticarət münasibətlərinə ciddi təsir göstərə bilər. Ekspertlər yeni tarif siyasətinin qlobal bazarlara təsirini diqqətlə izləyirlər.
