1news.az

Nəqliyyat eksperti: “Bəzi icra başçıları Bakını qarış-qarış satdılar, indi də biz bunun yaratdığı problemləri görürük”

19 Fevral saat 13:10 ~ 3 dəqiqəlik oxu 698
Nəqliyyat eksperti: “Bəzi icra başçıları Bakını qarış-qarış satdılar, indi də biz bunun yaratdığı problemləri görürük”

Məlum olduğu kimi, ötən gün Prezident İlham Əliyev Bakı Nəqliyyat Agentliyinin İdarə Heyətinin sədri Vüsal Kərimlini qəbul edib. Qəbulda Bakının nəqliyyat problemləri, görülən işlər müzakirə olunub.

Məsələ ilə bağlı 1news.az-a danışan nəqliyyat eksperti Elməddin Muradlı deyib ki, ölkə Prezidenti vətəndaşların problemlərindən məlumatlıdır.

“Əvvəlcə şərait yaradılmalıdır, sonra cərimə tətbiq olunmalıdır. İstər Dövlət Yol Polisi, istərsə də Bakı Nəqliyyat Agentliyi nəzarət edəndə cərimələrin yazıldığı müşahidə edilir, bu da müəyyən qədər narazılıq yaradır”.

Ekspert bildirib ki, qaydalar hamı üçündür, ancaq qaydalara riayət olunması üçün şərait yaradılmalıdır. “Bəzən qurumlar fərxlə bəyan edir ki, filan qədər cərimə yazılıb, ötən ilə nisbətən daha çox cərimə yazılıb və s. Mən bunun əleyhinəyəm, burada qürur duyulası bir şey yoxdur. Məsələyə həssas yanaşmaq lazımdır, aydınlaşdırılmalıdır ki, bu qədər qayda niyə pozulub. Bununla bağlı araşdırma aparmaq lazımdır, əgər çox cərimə yazılırsa, demək vəziyyət yaxşı deyil. Məsələyə bu aspektdən yanaşılmalıdır. Cənab Prezident də onu ifadə etdi ki, insanların şəraitini yaxşılaşdırmaq lazımdır, dayanma-durma üçün yerlər yaradılmalıdır, sonra cərimə barədə düşünmək lazımdır. Bakıda lazımsız yerlərdə dayanma-durmanı qadağan edən nişanlar qoyulub, illərdir bu vəziyyət belədir. Bəzi adamlar var ki, onlar qaydaları sərt şəkildə pozur, onlara qarşı mübarizə daim aparılmalıdır”.

E.Muradlı deyib ki, Bakıda bir çox yerlər var, həmin yerlərdə axşam saat 8-dən sonra bir sıra səliqəli parklanma etmək heç kimə mane olmur.

“Düşünürəm ki, belə yerlərdə araşdırılma aparılmalı, əgər mümkün olarsa axşam saatlarında parklanmaya icazə verilməlidir. Xəstəxanaların, məktəblərin ətrafında parklanma üçün şərait yaradılmalıdır. Şərait olmadığı üçün qayda pozuntuları olur. Təəssüflər olsun ki, bəzi icra başçıları Bakını qarış-qarış satdılar, indi də biz bunun yaratdığı problemləri görürük. Bu dövlətimiz üçün ağır bir yükə çevriləcək. İllər sonra avtomobilləşmə çoxaldıqca bu ağır yükü daha çox hiss edəcəyik. Bu məsələlər elə həll olunmalıdır ki, 15-20 ildən sonra biz bu məsələyə bir də qayıtmayaq”.

O bildirib ki, qanunun tələbinə görə bina tikilərkən onun sakinlərinin parkinq məsələsi öz həllini tapmalıdır.

“Amma indi bəzi şirkətlər binanı tikirlər, avtomobil parklanması üçün yeri vətəndaşlara baha qiymətə təklif edirlər. Bir otaqlı evin qiymətinə qaraj satırlar, bunu da vətəndaşların əksəriyyəti ala bilmir. Diqqət yetirsək görərik ki, harada yeni bina tikilibsə, həmin ərazidə problem yaranır. Bina tikən adam Yol Polisindən, Bakı Nəqliyyat Agentliyindən razılıq almalıdır. Ancaq buna məhəl qoymayıb bina tikirlər, sonra da həmin ərazilərdə avtomobil sıxlığı, tıxac yaranır. Həmin adamlar məsuliyyətə cəlb edilməlidir”.

Qafar Ağayev

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News" İnformasiya Agentliyi,,
Bütün hüquqlar qorunur
entonee.net