Ərdoğan: “Sultan Əhməddəki partlayışı suriyalı kamikadze törədib” - FOTO - VİDEO - YENİLƏNİB
Türkiyə prezidenti Rəcəb Tayyib Ərdoğan İstanbuldakı Sultan Əhməd meydanında partlayışı törədənin kimliyini açıqlayıb.
1news.az-ın NTV-yə istinadla verdiyi xəbərə görə, Türkiyənin müxtəlif ölkələrdəki səfirləri ilə keçirdiyi görüşdə çıxış edən dövlət başçısı qeyd edib ki, partlayışı suriyalı kamikadze törədib.
Ərdoğan hadisə nəticəsində 10 nəfərin öldüyünü, 15 nəfərin isə xəsarət aldığını bildirib:
“Yaxın saatlarda hadisə ilə bağlı rəsmi açıqlama yayılacaq. Bizim üçün İŞİD, PKK və digər terror təşkilatlarının fərqi yoxdur. Bölgədə fəaliyyət göstərən bütün terror təşkilatlarının hədəfi Türkiyədir”.
1news.az
16:06
Azərbaycanın İstanbuldakı Baş Konsulluğunda şəhərdə baş verən partlayışda azərbaycanlıların olub-olmadığı aydınlaşdırılıb.
1news.az-a bu haqda Azərbaycan XİN-in mətbuat xidmətinin rəhbəri Hikmət Hacıyev məlumat verib.
O, qeyd edib ki, müvafiq tapşırıq Xarici İşlər Nazirliyi tərəfindən verilib. Yeni informasiya olunduqca məlumat veriləcək.
Hürriyyət qəzetinin İstanbul şəhər qubernatoruna istinadən yazdığına görə, bu gün İstanbulun Sultan Əhməd meydanında baş verən partayış nəticəsində 15 nəfər yaralanıb, 10 nəfər isə həyatını itirib.
Partlayışın səbəbləri və partlayıcı maddənin tipi haqqında hələ ki məlumat yoxdur.
Xatırladaq ki, məlumatlara əsasən, partlayış çərşənbə axşamı səhər saatlarında Sultan Əhməd meydanında beş verib. Partlayış zamanı meydanda turistlərdən ibarət qrup var idi.
Hazırda ərazi polislərin nəzarəti altındadır. Partlayış baş verən sahəyə minaaxtaranlar cəlb olunub.
13:59
Bu gün səhər İstanbulun Sultan Əhməd meydanında baş verən partlayış nəticəsində 10 nəfər ölüb, 15 nəfər yaralanıb.
1news.az Huriyyet qəzetinə istinadla xəbər verir ki, bu haqda türk meqapolisi valisinin bəyanatında bildirilir.
Partlayışın səbəbləri haqda əlavə məlumatlar veriləcək.
1news.az
İstanbulun Sultan Əhməd meydanında partlayış baş verib.
1news.az Hurriyet qəzetinə istinadən xəbər verir ki, partlayış nəticəsində bir neçə nəfər xəsarət alıb.
Ehtimal olunur ki, partlayış özünü turist kimi təqdim edən kamikadze tərəfindən törədilib.
Ölən və yaralananların sayı hələ ki bəlli deyil.
Hadisə yerinə təcili yardım maşınları göndərilib.
1news.az
