Rusiya sərnişin təyyarəsini partladanı tapanlara 50 milyon dollar mükafat verəcək
Rusiya hökuməti Misirin Sinay yarımadasında sərnişin təyyarəsini partladan terrorçuları tapan şəxsə mükafat verəcək.
1news.az-ın “РИА Новости”-yə istinadla verdiyi xəbərə görə, bu barədə FTX-nin mətbuat xidmətinin yaydığı məlumatda bildirilib.
Məlumata görə, Rusiya Federal Təhlükəsizlik Xidməti (FTX) Rusiyanın sərnişin təyyarəsinin Misirin Sinay yarımadasında partladan terrorçuların tapılmasına kömək edəcək məlumata görə 50 milyon dollar mükafat təyin edib.
Qeyd edək ki, FTX-nin başçısı Aleksandr Bortnikov Rusiyaya məxsus təyyarənin terror aktının qurbanı olduğunu açıqlayıb:
“Demək olar ki, bu terror aktıdır”.
Onun sözlərinə görə, ekspertiza qəzaya uğrayan təyyarənin hissələrində partlayıcı maddələr aşkar edib.
Rusiya prezidenti Vladimir Putin Misirin Sinay yarımadasında Rusiya təyyarəsinin qəzasının səbəbləri ilə bağlı aparılan araşdırmanın nəticələrinin açıqlandığı müşavirədə deyib ki, sərnişin təyyarəsinin partlayışına cəlb olunan terrorçular planetin istənilən nöqtəsində tapılacaq və cəzalandırılacaq.
Qeyd edək ki, “Koqalımavia” şirkətinə məxsus “Airbus A321” layneri oktyabrın 31-də Misirin Şarm-əl-Şeyx şəhərindən Sankt-Peterburqa uçarkən Sinay yarımadasının şimalında qəzaya uğrayıb. Təyyarənin göyərtəsində 217 sərnişin və 7 ekipaj üzvü olub. Onlardan heç biri sağ qalmayıb.
1news.az
