Rusiyanın baş naziri və Tacikistan prezidenti Azərbaycanın dövlət başçısını təbrik ediblər
Rusiyanın baş naziri Dmitri Medvedev və Tacikistan prezidenti Emoməli Rəhmon Azərbaycanın dövlət başçısı İlham Əliyevi doğum günü münasibətilə təbrik ediblər.
1news.az-ın dövlət başçısının rəsmi saytına istinadən xəbər verir ki, D.Medvedevin təbrik məktubunda deylir:
“Hörmətli İlham Heydər oğlu,
Sizi doğum gününüz münasibətilə ürəkdən təbrik edirəm.
Rusiyada Sizi dostluq və mehriban qonşuluq ənənələrinə əsaslanan Rusiya-Azərbaycan əməkdaşlığının bütün kompleksinin genişlənməsinin ardıcıl tərəfdarı kimi tanıyırlar. Şəxsən Sizin köməyinizlə energetika, sənaye, infrastruktur sahələrində iri müştərək layihələr həyata keçirilir, ölkələrimizin ictimai strukturları və biznes birlikləri xətti üzrə intensiv dialoq aparılır.
Sizinlə çoxsaylı görüşlərimizi səmimiyyətlə xatırlayıram. Maraqlı və etimada əsaslanan ünsiyyətimizi davam etdirməyə şad olaram.
Hörmətli İlham Heydər oğlu, Sizə möhkəm cansağlığı, firavanlıq və ali dövləti fəaliyyətinizdə yeni-yeni uğurlar diləyirəm”.
Tacikistan prezidenti Emoməli Rəhmon da təbrik məktubunda dövlət başçımıza ən xoş arzularını çatdırıb:
“Hörmətli İlham Heydər oğlu,
Doğum gününüz münasibətilə ən səmimi təbriklərimi qəbul edin. Qardaş Azərbaycanın həyatının bütün sahələrində qazanılan və haqlı olaraq Sizin ali dövləti fəaliyyətinizlə bağlı sayılan uğurlar dost ölkələrimiz arasında münasibətlərin keyfiyyətcə yeni səviyyəyə çatdırılması üçün geniş imkanlar yaradır. Qarşılıqlı faydalı Tacikistan-Azərbaycan münasibətlərinin daha da genişləndirilməsi ölkələrimizin və xalqlarımızın rifahı və firavanlığı naminə mənim də can atdığım məqsəddir.
Hörmətli İlham Heydər oğlu, icazə verin, bu xoş gündə Sizə səmimi qəlbdən möhkəm cansağlığı, ailənizə firavanlıq, bütün təşəbbüslərinizdə uğurlar diləyim”.
1news.az
