Rəşid Behbudovun 100 illiyinə həsr olunmuş konsert proqramı keçirilib – FOTO

Görkəmli müğənni Azərbaycanın xalq artisti Rəşid Behbudovun 100 illiyinə həsr olunmuş konsert proqramı keçirilib.

1news.az-ın məlumatına görə, Mədəniyyət və Turizm Nazirliyi, “ASAN Könüllüləri” Təşkilatı və Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə təşkilatçılığı ilə xalq artistinin adını daşıyan Dövlət Mahnı Teatrında keçirilən konsert proqramında R.Behbudovun  həyat və yaradıcılığı haqqında geniş məlumat verilib, sənətkarın Azərbaycan incəsənətində tutduğu mövqedən, yaradıcılığın səciyyəvi cəhətlərindən geniş söhbət açılıb.

Daha sonra istedadlı ASAN Könüllüləri öz bacarıqlarını sərgiləyib. Tədbirdə könüllülərin ifasında R.Behbudovun repertuarından sevilən mahnılar səslənib, sənətkarın həyat və yaradıcılığı ilə bağlı çəkilmiş “Bəxtiyar” filmindən və rol aldığı “Arşın mal alan” filmindən hissələr səhnələşdirilib, ustad sənətkarın ifa etdiyi mahnılar üzərində qurulmuş rəqs nömrələri tamaşaçılara təqdim olunub.

Qeyd edək ki tədbirin keçirilməsində əsas məqsəd, gənclər arasında R.Behbudov yaradıcılığının təbliği, istedadlı könüllüləri üzə çıxarmaq, onların milli-mənəvi dəyərlərimiz, milli-mədəni sərvətimiz və musiqi tariximiz haqqında daha geniş biliklərə sahib olmalarına kömək göstərməkdir.

1news.az