Dünya Azərbaycanlılarının Həmrəyliyi Günü Meksikada qeyd olunub
Azərbaycanın Meksikadakı səfirliyində Dünya Azərbaycanlılarının Həmrəyliyi Günü münasibətilə tədbir keçirilib.
Səfirlikdən 1news.az-a verilən məlumata görə, tədbirdə Meksikada yaşayan azərbaycanlı icmasının nümayəndələri – tanınmış elm və mədəniyyət xadimləri də daxil olmaqla cəmiyyətin müxtəlif təbəqələrindən olan həmvətənlilər iştirak ediblər.
Tədbiri giriş sözü ilə açan səfir İlqar Muxtarov iştirakçıları Dünya Azərbaycanlılarının Həmrəyliyi Günü və qarşıdan gələn yeni il münasibətilə təbrik edərək, ənənəvi olaraq hər il keçirilən bu tədbirin həmrəylik və milli birliyimizin bir nümayişi olduğunu diqqətə çatdırıb, həmvətənlilərimizi Azərbaycanın təbliği və dövlət maraqlarının təmin edilməsi istiqamətində əməkdaşlığımızı gücləndirməyə çağırıb.
Sonra tədbir iştirakçılarına Azərbaycan Prezidenti İlham Əliyevin Həmrəylik Günü münasibətilə dünya azərbaycanlılarına müraciəti oxunub.
Tədbirdə Azərbaycanın milli mətbəxt nümunələrindən ibarət ziyafət verilib, xalq musiqiləri səsləndirilib.
Bununla yanaşı səfirlik tərəfindən ispan dilində hazırlanmış və Meksikada dərc edilmiş “Xocalıda Soyqırım” jurnalı, “Azərbaycan mətbəxi” kitabı, həmçinin tərəfimizdən ispan dilinə tərcümə edilərək Meksikada dərc edilmiş “İrəvan xanlığı”, “Sumqayıt 1988: Cinayət və Cəza” kitabları, ispandilli “İRS” jurnalının buraxılışları tədbir iştirakçılarına paylanılıb.
1news.az
