İran səfirliyi: "Azərbaycanlı uşağın Təbrizdə vəfat etməsindən təəssüflənirik"

İran İslam Respublikasının Azərbaycan Respublikasındakı səfirliyinin Mətbuat katibi tərəfindən Təbrizdə vəfat etmiş Azərbaycanlı uşaq barədə açıqlama verilib.

1news.az xəbər verir ki, İran İslam Respublikasının Azərbaycan Respublikasındakı səfirliyinin mətbuat katibi cənab Məhəmmədrza Nəcəfi Azərbaycan vətəndaşı Qorqud Dadaşzadənin Təbrizin “Kudəkan” xəstəxanasında vəfatına görə təəssüfləndiyini bildirərək deyib:

“Hər il müxtəlif ölkələr və o cümlədən Azərbaycan Respublikasının vətəndaşlarından olan minlərlə insan müalicə üçün İrana üz tutur və onların əksəriyyəti İranda aldıqları müalicədən razılıq bildirirlər. Dünyada mövcud olan bütün xəstəxanalar öz xəstələrinin sağalması və şəfa tapmasını istəyir. Hər halda Allahın təqdiri ilə də barışmaq lazımdır”.

Nəcəfi dünyasını dəyişmiş uşağın xəstəxana xərcləri barədə dedi: “Görülən tədbirlər nəticəsində 15 min 500 manat borcdan 12 min 300 manatı İranın xeyriyyə cəmiyyəti tərəfindən ödənilmiş və hal-hazırda yalnız 3200 manat borc qalmışdır. Biz yenə də məsələni diqqət mərkəzində saxlayırıq. Azərbaycan Respublikasının Tehran və Təbriz şəhərlərində yerləşən siyasi nümayəndəlikləri, eləcə də Azərbaycanın humanitar qurumlarının öz vətəndaşına yardım üçün lazım olan addımı atacağını ümid edirik”.

Qeyd edək ki, Azərbaycan vətəndaşı Dadaşzadə Qorqud dünən günorta saatlarında İranın Təbriz şəhərində yeləşən "Kudəkan" xəstəxanasında ağciyərinə düşən infeksiya nəticəsində dünyasını dəyişib. Xəstəxana ailənin 3 200 manat borcu olması səbəbindən uşağın meyitini ailəsinə təhvil verməktən imtina edir.

1news.az