Kanadada meşə yanğınları səbəbindən 60 min insan təxliyə edilib
Kanadanın Alberta əyalətində tüğyan edən meşə yanğınları artıq yaşayış məskənlərinə çatıb. Yerli hakimiyyət orqanları Fort-Makmürrey şəhərinin və ona bitişik 7 rayonunun bütün sakinlərinin məcburi təxliyəsi barədə məlumat yayıb.
1news.az-ın AZƏRTAC-a istinadən verdiyi xəbərə görə, şəhərin əhalisi təxminən 61 min nəfərdir, ümumilikdə isə 100 min nəfərədək insan təhlükə qarşısında qalıb.
Yanğınlar sürətlə yaşayış evlərinə keçir, onların çoxu artıq tamamilə yanıb. Yanğının söndürülməsi üçün aviasiya cəlb edilsə də, quru hava və güclü külək şəhəri mühasirəyə almış alovu söndürmək cəhdlərini çətinləşdirir.
Avtomobil yollarında böyük tıxaclar yaranıb. Bir çox tras polis tərəfindən bağlanıb. Xəsarət alanlar barədə hələ ki, məlumat verilmir. Hökumət əhalinin təcili təxliyəsi ilə məşğuldur. Alovun şəhər kənarında yerləşən bir neçə məhəlləni məhv etdiyi və yanğının şəhərin mərkəzinə yaxınlaşdığı bildirilir.
1news.az
