ANAMA Tərtər və Ağdam rayonlarında top mərmisi və mina aşkar edib -FOTO

İyunun 14-də dörd ev və həyətyanı sahəyə, 7 əkin sahəsinə, 28 partlayış yerinə baxış keçirilib. Tərtər rayonunun Cəmilli kəndində bir partlamamış hərbi sursat – “9M22U” qrad raketinin mühərrik hissəsi aşkar edilərək götürülüb. Rayonun Şıxarx kəndində 122 millimetrlik “OF-56” top mərmisi aşkar edilib.

ANAMA-nın mətbuat xidmətindən 1news.az-a verilən məlumata görə, Ağdam rayonunun Əfətli kəndində əkin sahəsində piyada əleyhinə “PMN-E” minası aşkar olunaraq işarələnib və zəruri təhlükəsizlik tədbirləri görülüb. Aşkar olunmuş mina partlayış yolu ilə iyunun 15-də zərərsizləşdiriləcək. Gün ərzində 56 min 270 kvadratmetr ərazi minalardan təmizlənib.

Ağdam rayonunun Qaradağlı, Füzuli rayonunun Qazaxlar kəndlərində və Horadiz şəhərində əkin sahələrində partlayış yerlərinə baxış keçirildiyi zaman partlamamış hərbi sursat aşkar edilməyib. Cəmi 19 min 270 kvadratmetr ərazi yoxlanılıb.

Ümumilikdə agentlik tərəfindən aprelin 7–dən iyunun 14-dək Zərdab, Tərtər, Ağcabədi, Ağdam, Füzuli, Goranboy, Tovuz, Samux, Şəmkir, Cəlilabad, Ucar, Astara rayonlarında, Mingəçevir, Sumqayıt və Bakı şəhərlərində 602 ev və həyətyanı sahəyə, 2 hərbi hissəyə, 2 kənd qəbiristanlığına, 5 kənd orta məktəbinə, 1 tibb məntəqəsinə, 22 fermaya, əkin sahələrinə və şərab zavodu ərazisinə baxış keçirilib. 1528 partlamamış hərbi sursat, piyada əleyhinə 14, o cümlədən 3 “POMZ-2” və tank əleyhinə 7 mina aşkarlanaraq zərərsizləşdirilib.

Hazırda agentlik tərəfindən yaradılmış xüsusi təyinatlı mobil çevik qrupları minaaxtaran itlərin dəstəyi ilə təmas xəttinin yaxınlığındakı kəndlərdə evlərin, məktəblərin və digər obyektlərin yerləşdiyi ərazilərdə əməliyyatları davam etdirir.

1news.az