Metro stansiyalarında yeni oturacaqlar quraşdırılır - FOTO

“Bakı Metropoliteni” Qapalı Səhmdar Cəmiyyəti bəzi metro stansiyalarının platformalarında təhlükəsizlik tədbirlərini gücləndirmək məqsədilə yığışdırdığı oturacaqların yenidən quraşdırlımasına başlayıb.

1news.az-ın sözügedən qurumun mətbuat xidmətinin rəhbəri Nəsimi Paşayevə istinadən verdiyi xəbərə görə, hazırda metronun “Elmlər Akademiyası” stansiyasının platformasında yeni oturacaqlar quraşdırılıb və sərnişinlərin istifadəsinə verilib:

“Keçən il stansiyalarda təhlükəsizlik tədbirlərini gücləndirmək üçün bəzi stansiyalarda platformalardakı oturacaqlar yığışdırılmışdı. İndi həmin stansiyalarda yeni və müasir oturacaqların quraşdırılmasına başlanıb. Artıq “Elmlər Akademiyası” stansiyasında həmin oturacaqlar quraşdırılıb və sərnişinlərin istifadəsinə verilib. Yaxın günlərdə “Cəfər Cabbarlı” və “Sahil” stansiyalarının platformalarında da oturacaqlar quraşdırılacaq”.

N.Paşayev bildirib ki, adıçəkilən stansiyaların hər birinin platformasında 10 oturacaq quraşdırılacaq.

1news.az