XİN: Fransada törədilən terror aktında ölən və yaralananlar arasında Azərbaycan vətəndaşının olub-olmaması araşdırılır

Azərbaycan Xarici İşlər Nazirliyi Fransada törədilən terror aktı ilə bağlı bəyanat yayıb.

1news.az-ın məlumatına görə, bəyanatda terror aktı kəskin şəkildə pislənilir:

“Fransanın Nitsa şəhərində törədilmiş terror aktını kəskin şəkildə pisləyirik. Bu terror aktı nəticəsində həyatını itirənlərin ailələrinə və yaxınlarına dərin hüznlə baş sağlığı verir və yaralananların tezliklə şəfa tapmasını diləyirik.

Terrorizmdən əziyyət çəkən dövlət kimi Azərbaycan Respublikası terrorizmin bütün forma və təzahürlərini qəti şəkildə pisləyir”.

Bəyanatda qeyd olunub ki, Azərbaycan Respublikasının Fransadakı səfirliyi terror aktı nəticəsində ölən və yaralananlar arasında Azərbaycan vətəndaşının olub-olmamasını bu ölkənin müvafiq orqanları vasitəsilə araşdırır.

“Hal-hazırda Fransada olan Azərbaycan Respublikası vətəndaşlarını Fransa hakimiyyət orqanlarının təhlükəsizlik tədbirlərinə riayət etməyə və kütləvi yerlərdən kənar durmağa çağırırıq”- deyə, bəyanatda qeyd olunub.

Xatırladaq ki, dünən axşam Fransanın Nitsa şəhərində terror aktı törədilib. Belə ki, naməlum şəxslər yük avtomobilini küçədə bayram şənliyi ilə əlaqədar gəzişən insanların üzərinə sürüb. Avtomobil yüksək sürətlə hərəkət edərək qarşısına çıxan insanları əzib. Nəticədə 80-dən çox insan ölüm, xeyli sayda insan isə müxtəlif dərəcəli xəsarətlər alıblar.

1news.az