“Polislər” gözətçini oğurlayaraq 3 min manat pulunu aldılar

Novxanı sakinini girov götürərək pulunu alan saxta polislər saxlanılıblar.

1news.az xəbər verir ki, bu barədə Daxili İşlər Nazirliyindən məlumat veriblər.

Məlumata görə, iyulun 26-da Novxanı kənd sakini Əli İsmayılov Abşeron Rayon Polis İdarəsinə müraciət edərək iyulun 24-də saat 03:00 radələrində Novxanı qəsəbəsində gözətçi işlədiyi evə gəldikdən sonra özünü Cəlilabad Rayon Polis Şöbəsinin əməkdaşı kimi təqdim edən Səid adlı şəxsin onun barəsində şikayət ərizəsi olduğunu bildirib qəsəbənin ərazisindəki evlərdən birinə apararaq orada 1 gün saxladığını bildirib.

Onun sözlərinə görə, həmin şəxs ona hədə-qorxu gələrək 5000 manat pul istəyib, 3000 manat aldıqdan sonra isə buraxıb. Lakin sonradan telefonuna zəng edib əlavə 2000 manat pul tələb edib.

Baş Cinayət Axtarışı İdarəsi və Abşeron RPİ əməkdaşlarının həyata keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən Cəlilabad rayon sakinləri, əvvəllər məhkum olunmuşlar Tural Səfərov, Atakişi Şahmarov və Seymur Qurbanov tutulublar.

T.Səfərovdan 5,58 qram, S.Qurbanovdan isə 5,79 qram marixuana götürülüb.

1news.az