Elin Süleymanov: Azərbaycan tərəfi seçkilərin nəticəsindən asılı olmayaraq ABŞ-la strateji əməkdaşlığı davam etdirəcək
Azərbaycanın ABŞ-dakı səfiri Elin Süleymanov Dövlər Departamenti tərəfindən keçirilən proqram çərçivəsində beynəlxalq diplomatlardan ibarət qrupun tərkibində Respublikaçılar və Demokrat partiyalarının Klievlend və Filadelfiya şəhərində qurultayında iştirak edib.
1news.az-ın Amerikanın Səsi-nə istinadla verdiyi xəbərə görə, bu haqda Elin Süleymanov Filadelfiyada Demokrat partiyasının qurultayında öz təəsüratları ilə bölüşüb:
“Çox maraqlıdır. Klivlenddə və Filadelfiyada maraqlı müzakirələr aparılır. Səfər Dövlət Deprtamentinin protokol xidməti tərəfindən keçirilir. Klivlenddə və Filadelfiyada 80-dən yuxarı səfir iştirak edir, o cümlədən Azərbaycan Respublikasının səfiri. Biz həm Demokrat partiyasının, həm də Respublikaçılar partiyasının xarici siyasət komandaları ilə görüşmüşük, maraqlı müzakirələr aparmışıq və gələcək administrasiya hansı olsa, onların gələcək baxışları ilə tanış olmuşuq. Gələcəkdə hansı fikirlərin, hansı siyasi yanaşmaların olacağını demək hələ tezdir. Amma səfirlər üçün bu görüşlər çox maraqlı keçir”.
Elin Süleymanov seçkilərdə hansı partiyanın qələbə qazanmasından asılı olmayaraq Azərbaycan və Amerika arasında ikitərəfli münasibətlərin durmadan inkişaf edəcəyinə inandığını bildirib.
“Azərbaycan tərəfi seçkilərin nəticəsindən asılı olmayaraq Amerika ilə strateji əməkdaşlığı davam etdirəcək və Amerika tərəfi də Azərbaycanın strateji əhəmiyyətini, regionda aparıcı rolunu tanıyır. Bunu hər iki qurultayda iştirak edərək, müxtəlif müşavirlərlə, xarici siyasətlə məşğul olan şəxslərlə görüşərək gördük ki, həqitətən də Amerika tərəfi Azərbaycanla strateji, konstruktiv münasibətləri davam etdirməkdə maraqlıdır. Bu da təbii haldır. Bilirsiniz ki, artıq bir neçə ildir ki, Azərbaycan Respublikasının Prezidenti İlham Əliyev tərəfindən aparılan siyasətin nəticəsində bu gün Azərbaycan müxtəlif dövlətlərlə, o cümlədən, ABŞ-la çox güclü, çox müsbət münasibətlər qurub və istəyirik ki, bu münasibətlər davam etsin”.
1news.az
