Ərdoğan: Şübhəsiz ki, 7 avqust mitinqində Azərbaycanın da bayrağı dalğalanacaq
Avqustun 7-də İstanbulda keçiriləcək demokratiya və şəhidlər mitinqində Türkiyənin dövlət bayrağından başqa yalnız Azərbaycanın və Şimali Kiprin bayraqları dalğalana bilər.
Bu fikri Türkiyə Prezidenti Rəcəb Tayyib Ərdoğan Türkiyənin ticarət palataları və birjalarının rəhbərləri ilə keçirdiyi toplantıda deyib:
“Bazar günü Yeniqapı meydanında mitinq keçirməyi planlaşdırırıq. Bütün xalqı mitinqə dəvət edirik. Buna görə də, parlamentin spikeri başda olmaqla bütün partiya rəhbərlərini - AK parti (Ədalət və İnkişaf Partiyası), CHP (Cumhuriyyət Xalq Partiyası), MHP (Milli Hərəkat Partiyası) dəvət etmişəm. İstəyirəm ki, hər kəsə xalqımızın birliyinə bəyan olsun. Çünki bu mitinq demokratiya və şəhidlərin xatirəsinə həsr olunub”.
“İstanbulda keçiriləcək demokratiya və şəhidlər mitinqində Türkiyənin bayrağından başqa heç bir qurumun, təşkilatın bayrağını görmək istəmirik. Lakin Şimali Kipr Türk Cumhuriyyəti və Azərbaycan bayraqları mitinqdə dalğalana bilər. Buna heç bir şübhəmiz yoxdur”, - deyə Ərdoğan sözlərinə əlavə edib:
“Bilirik ki, mitinqə çox hörmətli Devlet Bahçeli (MHP-nın lideri) də gələcək. Minnətdarıq. İstərdim ki, burada Kılıçdaroğlu da (CHP-nin lideri Kemal Kılıçdaroğlu) olsun”.
Qeyd edək ki, İstanbulun Yeniqapı meydanında “Demokratiya və şəhidlər” şüarı altında demokratiyaya dəstək mitinqi 15 iyul dövlət çevrilişinə cəhddən sonra təşkil edilən mitinqlərin ən izdihamlısı olacaq. Bu mitinqdə Türkiyənin siyasi partiyalarının liderləri, tanınmış şəxslər, incəsənət xadimləri, idmançılar da iştirak edəcəklər.
1news.az
