Vladimir Putin Rusiya, Azərbaycan və İran üçün ümumi təhdidləri açıqladı
Azərbaycan və İran Rusiya üçün mehriban qonşular və vacib tərəfdaşlardır.
1news.az-ın məlumatına görə, bunu Bakıda keçirilən Azərbaycan, İran və Rusiya dövlət başçılarının üçtərəfli Zirvə görüşündə çıxışı zamanı Rusiya prezidenti Vladimir Putin deyib.
“Bu gün biz münasibətlərimizdə yeni səhifə açırıq, üçtərəfli əməkdaşlığa start veririk” deyən V.Putin hər üç dövlət üçün ümumi oxşar problemlərdən də söz açıb:
“Bütün dövlətlər oxşar problemlərlə qarşılaşırlar. Bizim ölkələr üçün bunlar həm Əfqanıstan, həm Yaxın Şərq, İŞİD tərəfindən getdikcə artan terror təhlükəsidir. Ona görə də terror təşkilatları ilə mübarizədə informasiya mübadiləsi sahəsində fəaliyyətin gücləndirilməsini vacib hesab edirik”.
Rusiya prezidenti Xəzərin statusuna da toxunaraq bildirib ki, Xəzərlə bağlı imzalanan konvensiya bütün Xəzəryanı ölkələrin maraqlarına cavab verir.
1news.az
