XİN: Azərbaycanın separatçı ermənilərin Tehranda keçirilən idman yarışında iştirakı ilə bağlı mövqeyi İran tərəfinə çatdırılacaq – FOTO
Məsələ ilə əlaqədar Xarici İşlər Nazirliyinin məlumatı vardır və ölkəmizin İrandakı səfirliyi bununla bağlı Azərbaycanın mövqeyini İranın müqabil dövlət qurumlarına çatdıracaqdır.
1news.az-ın verdiyi məlumata əsasən, bu haqda Azərbaycan Xarici İşlər Naziriliyinin mətbuat xidmətinin rəhbəri Hikmət Hacıyev İranda 48-ci erməni olimpiyadasında Azərbaycanın işğal olunmuş ərazilərində yaradılan separatçı rejimin təmsilçilərinin iştirak etməsini şərh edərkən deyib.
“Bildirmək istərdik ki, İran həmişə Azərbaycanın ərazi bütövlüyü və suverenliyi əsasında BMT Təhlükəsizlik Şurasının müvafiq qətnamələrinə uyğun olaraq Ermənistan-Azərbaycan münaqişəsinin həllini dəstəkləmişdir”, - deyə H.Hacıyev əlavə edib.
Qeyd edək ki, SalamNews-un verdiyi məlumata əsasən, sentyabrın 13-ü İranın paytaxtı Tehranda yerləşən "Ararat" klubunda 48-ci Erməni Olimpiadasının açılışı keçirilib.
Açılış mərasimində Tehranın erməni pravoslav yeparxiyasının nümayəndəsi arxiyepiskop Sebuh Sarkisyan, Ermənistanın İrandakı səfiri, İranın Ermənistandakı səfiri və Ermənistanın tanınmış atletləri iştirak ediblər.
İran Milli Olimpiya Komitəsinin prezidenti Kiamərz Haşimi və İran prezidentinin milli və dini azlıqlarla iş üzrə müşaviri Əli Yunisi də tədbir iştirakçıları arasında olub.
10 günlük oyunlar çərçivəsində İran, Ermənistan və Gürcüstandan olan 800 erməni atlet 9 idman növü üzrə yarışacaq.
Rəsmi məlumatlarda qeyd edilməsə də, olimpiadada qondarma Dağlıq Qarabağ Respublikası da təmsil olunub. Bunu açılış zamanı çəkilmiş fotoşəkillər sübut edir. Belə ki, fotoşəkillərdə erməni idmançıların geyimlərinin üzərində "Artsax" yazısı və separatçı rejimin bayrağının əksini aydın görmək mümkündür.
1news.az
