Xalq şairi Zəlimxan Yaqubun məzarüstü abidəsinin açılışı olub
Bu gün Bakıda I Fəxri xiyabanda mərhum xalq şairi Zəlimxan Yaqubun məzarüstü abidəsinin açılışı olub.
1news.az-ın məlumatına görə, mərasimdə şairin ailə üzvləri ilə yanaşı elm, mədəniyyət xadimləri, ziyalılar və ictimaiyyət nümayəndələri iştirak ediblər.
Abidənin açılışından sonra tədbirə toplaşanlar mərhum şairlə bağlı xatirələrini bölüşüblər.
Milli Məclisin Mədəniyyət komitəsinin sədri, akademik Rafael Hüseynov çıxış edərək şairin Azərbaycan ədəbiyyatının inkişafındakı xidmətlərindən danışıb.
Z.Yaqubun böyük şair və vətənpərvər insan olduğunu deyən R.Hüseynov Azərbaycan Prezidenti İlham Əliyevin şairə xüsusi qayğısı və ehtiramının olduğunu bildirib, dövlətimizin böyük şairin irsinə yüksək dəyər verdiyini deyib:
“O, bu gün abidə formasında yenidən bizə qayıdıb. 66 il ömür sürən Zəlimxan Yaqub Azərbaycanın ən dəyərli şairlərindən biridir. O, Azərbaycan tarixində daimi yaşanacaq”.
Professor Qəzənfər Paşayev, millət vəkili Nizami Cəfərov Zəlimxan Yaqubun “Peyğəmbər”, “Əbədiyyət Dastanı”, “Saz” poemalarının ədəbi dəyərindən danışıb, onu müstəsna şəxsiyyət kimi dəyərləndiriblər.
Mərasimdə çıxış edən digər natiqlər Z.Yaqubun sözün, millətin və ölkənin qarşısında tarixi məsuliyyətini hiss edən bir şair olduğunu bildirməklə yanaşı, onun qüdrətli qələm sahibi kimi daim ürəklərdə yaşayacağını söyləyiblər.
Qeyd edək ki, Z.Yaqub 1950-ci il yanvarın 21-də Gürcüstanın Bolnisi rayonunun Kəpənəkçi kəndində anadan olub. 1967-ci ildə doğulduğu kənddə orta məktəbi, 1972-ci ildə isə Azərbaycan Dövlət Universitetinin kitabxanaçılıq fakültəsini bitirib. 1995-2005-ci illərdə Milli Məclisin deputatı olub. 2008-ci il avqustun 29-dan ömürünün sonunadək Azərbaycan Aşıqlar Birliyinin sədri işləyib.
O, 2016-cı il yanvarın 9-da dünyasını dəyişib. Şair uzun müddət böyrək çatışmazlığından əziyyət çəkib.
Onu da bildirək ki, xalq şairinin abidəsinin müəllifi xalq rəssamı Natiq Əliyev, memarı isə Tərlan Həsənovdur.
1news.az
