Təhsil İdarəsi: “Yoxlama” verilişinin 171 saylı məktəbdəki çəkilişi qanunsuz olub – VİDEO

Ümumtəhsil məktəblərdə foto və videoçəkilişlər, eləcə də reportajların hazırlanması “İnformasiya haqqında” qanunla tənzimlənir.

Bu haqda Bakı şəhər Təhsil İdarəsinə 1news.az-ın ünvanladığı sorğuya əsasən cavab verilib.

“Yoxlama” verilişinin rəhbərliyi 171 saylı məktəbdəki çəkilişlə bağlı Bakı şəhər Təhsil İdarəsindən sorğu almayıb, buna görə də çəkilişlər üçün razılıq da verilməyib.

İdarədən bildirilib ki, KİV bu məsələni əvvəlcədən işıqlandırarsa jurnalistləri maraqlandıran lazımi şərait yaradılar.

Bunda əlavə, qeyd edilir ki, “Təhsil haqqında”, “İnformasiya haqqında”, “KİV haqqında” və digər qanunverici aktlara əsasən KİV-lə effektiv əməkdaşlığa üstünlük verilir.

Xatırladaq ki, ATV telekanalında yayımlanan “Yoxlama” verilişinin çəkiliş heyəti 171 saylı məktəbdə çəkiliş aparıb. Veriliş efirə getdikdən bir neçə gün sonra məktəbin direktoru vəfat edib.

1news.az-a mərhum Telman Qardaşovun yaxınları bildiriblər ki, onun vəziyyəti məktəbdə gedən çəkilişlərdən sonra pisləşib.

T.Qardaşov xəstəxanaya çatdırılsa da, onun həyatını xilas etmək mümkün olmayıb.

1news.az