İranlı deputat: Azərbaycan ilə İranın həyata keçirdikləri birgə layihələr xalqlarımızın mənafeyinə xidmət edir

Azərbaycanın İrandakı səfiri Bünyad Hüseynovun İran-Azərbaycan parlamentlərarası işçi qrupunun həmsədri Salman Xodadadi ilə görüşündə hər iki ölkənin qanunverici orqanlarının əməkdaşlığının inkişafına dair fikir mübadiləsi aparılıb.

1news.az-ın AZƏRTAC-a istinadən verdiyi xəbərə görə, səfir İki ölkə arasında iqtisadi-ticarət əlaqələrinin yüksələn xətlə inkişaf etdiyini bildirib. Qeyd olunub ki, Azərbaycan ilə İranın tranzit daşımalar sahəsində həyata keçirdikləri birgə layihələr regional və beynəlxalq əhəmiyyət daşıyır. Astara (Azərbaycan)-Astara (İran) dəmir yolu layihəsi isə Şimal-Cənub beynəlxalq nəqliyyat dəhlizinin təkmilləşdirilməsi üçün önəmli həlqədir.

B.Hüseynov Azərbaycan ilə İran arasında imzalanmış sazişlərin İslam Şurası Məclisində növbədənkənar ratifikasiya olunmasına göstərdikləri dəstəyə görə işçi qrupun üzvlərinə təşəkkürünü bildirib.

S.Xodadadi İran və Azərbaycan xalqlarının yaxın qonşu, dost və qohum xalqlar olduğunu nəzərə çatdırıb. Bakıya etdiyi səfərdən və keçirdiyi görüşlərdən danışan deputat son illər iki ölkə arasındakı münasibətlərin inkişafından məmnunluğunu ifadə edib. O, iki dost və qardaş dövlətin həyata keçirdikləri birgə iqtisadi layihələrin xalqlarımızın mənafeyinə xidmət etdiyini diqqətə çatdırıb.

İşçi qrupun həmsədri Azərbaycan Prezidentinin 2017-ci ili ölkədə “İslam Həmrəyliyi İli” elan etməsini tarixi qərar və İslam dünyasında vəhdətə nail olmaq üçün irəli sürülən əhəmiyyətli ideya kimi qiymətləndirib.

İran parlamentinin nümayəndəsi Prezident İlham Əliyevin Sərəncamı ilə Bakıda Heydər məscidi kimi möhtəşəm dini abidənin inşa edilməsini İslama göstərilən ən böyük xidmət adlandırıb.

Görüşdə qarşılıqlı maraq doğuran bir sıra məsələlər ətrafında fikir mübadiləsi aparılıb.

1news.az