İƏT gənclik paytaxtından “Məzhəblərarası toqquşmaya son qoyulsun” çağırışı – FOTO
Məzhəblərarası toqquşmalar İslam dünyasına, müsəlman coğrafiyasına xaricdən zərbə vuran İslamofobiyadan da artıq zərər vurur. Çünki məzhəb düşmənçiliyinin qızışdırılması tək bu günün toqquşmalarını artırmaq deyil, eyni zamanda yeni nəsillərin beyninin zəhərlənməsi deməkdir”.
1news.az-a İƏT, Avrasiya Regional Mərkəzindən verilən məlumata əsasən, bu sözləri İƏT Gənclər Forumunun sədri Elşad İskəndərov Şirazda “İƏT Gənclər paytaxtı – 2017” proqramının açılış mərasimində söyləyib.
2016-ci ildə “İƏT Gənclər Paytaxtı”na ev sahibliyi edən İstanbuldan sonra İƏT Gənclər və İdman nazirləri (İƏT GİN) 3-cü konfransının qərarı ilə bu ada Malayziyanın Putrajaya, İranın Şiraz və Mərakeşin Fəs şəhərləri layiq görülüb. Nazirlər konfransının digər qərarı ilə proqramın həyata keçirilməsi İƏT GİN Konfransının beynəlxalq Katibliyi statusu verilmiş İƏT Gənclər Forumuna həvalə edilib.
Fevralın 4-də İranın vitse-prezidenti Şahindoxt Molaverdi, gənclər və idman naziri Məsud Sultanifar, Fars vilayətinin valisi Əfşani və digər yüksək səviyyəli İran və beynəlxalq nümayəndələrin iştirakı ilə keçirilən təntənəli mərasimdə “İƏT Gənclər Paytaxtının” simvolik açarı İranın tarixi və mədəni mərkəzlərindən biri olan Şiraz şəhərinə təqdim edildi. Mərasimdə qeyd edilib ki, 2017-ci il ərzində “Birlik naminə Gənclik Yaradıcılığının gücləndirilməsi” şüarı ilə gercəşdiriləcək “Gənclər Paytaxtı” proqramı çərçivəsində elmi, mədəni və yaradıcılıq sahəsində müxtəlif tədbirlərin keçirilməsi planlaşdırılır.
Açılış mərasimində çıxış edən İƏT Gənclər Forumunun sədri Elşad İskəndərov əsas hədəflərindən biri müsəlman dünyasının birliyi və əməkdaşlığı olan İKGF-nin hər cür məzhəbçiliyə yönəlmiş ifratçılığa və təkfirçilik ideologiyasına qarşı oldugunu qeyd edərək bildirib:
"Müsəlman coğrafiyasında ifratçılıq əsasında baş verən münaqişələrin dayandırılması üçün cəmiyyət öndərləri ilk növbədə öz məzhəblərindən gələn ekstermist cağırışları açıq şəkildə qınmalaıdırlar və bu yöndə siyasi və mənəvi güclərini qətiyyətlə ortaya qoymalıdırlar. Sürətlə artan islamofob təqiblər müsəlmanlar arasında sunni-şiə ayrılığı etmədən bütövlükdə müsəlman dünyası üçün təhlükə olmaqdadır. Ən azı, bu səbəbdan məzhəb ayrıcılıgının qarşısının alınması bütün İƏT ölkələri üçün vacib hədəf olmalıdır”.
Günümüzdə məzhəblərarası xoşgörü, dialoq və əməkdaşlığın bir sıra parlaq nümunələri sırasında yüz illərdən bəri irfan ənənəsi əsasında vəhdət və qardaşlığın örnəyi olan Azərbaycan modelini və Azərbaycan prezidenti İlham Əliyevin təşəbbüsü ilə bu ilin İslam həmrəyliyi ili elan edilməsini vurgulayan E.İskəndərov:
“Bu örnəklər və bu mesaj İƏT Gənclər Forumunun 2017-ci il ərizndə “İƏT Gənclik Paytaxtı” proqramı çərçivəsində də həyata keçiricəyi fəaliyyətlərin mərkəzində duracaqdır,” - qeyd edib.
Tədbir çərçivəsində İƏT Gənclər Forumu ilə İranın Gənclər və İdman Nazirliyi arasında “Gənclər Paytaxtı” proqramının həyata keçirilməsi üzrə əməkdaşlıq protokolu imzalanıb.
Qeyd edək ki, yaxın müddətdə Proqramın Mərakeşin Fəs və Malaziyanın Putracaya şəhərlərində də rəsmi açılışının gerçkləşdirilməsi nəzərdə tutulur.
1news.az
