Dennis Sammut: Əgər Rusiyada kimsə Trampın simasında ABŞ-dan dəstək alacaqlarına inanırsa, o zaman yanılırlar

Məşhur ekspert Dennis Samut Rusiya Liberal-Demokrat Partiyasının (RLDP) lideri Vladimir Jirinovskinin “Rusiyanın ABŞ-ın yeni prezidenti Donald Trampla SSR-i sərhədlərinin bərpasının razılığı” ilə bağlı çağırışını qeyri-ciddi adlandırıb.

“Jirinovski zaman-zaman heyranedici bəyanatlarla çıxış etməyi sevir. Açığı bu, ciddi şərhlər deyil”, - bunu 1news.az-a Londondakı LINKS analitika mərkəzinin rəhbəri, ekspert Dennis Sammut bildirib.

Onun sözlərinə görə, ola bilsin ki, Jirinovski D.Trampın ilk növbədə Amerika işləri (America First) ilə bağlı fikirlərini düzgün anlamayıb:

 “Düşünmürəm ki, V.Jirinovski bu ideyalara inanır. Bir neçə dəfə onunla görüşmüşəm. eləcə də şəxsi görüşlərdə olub. O, ictimai bəyanatlar zamanı çıxışlarından qat-qat daha ağıllıdır”.

Analitikin sözlərinə görə, bu cür bəyanatlar istər Jirinovski, istərsə də onunla birlikdə çalışanlar üçün əlverişlidir. Belə ki, həmin adamlar zaman-zaman bu cür bəyanatlar yaymaqla vətəndaşları öz real problemindən uzaqlaşdırmağa çalışır:

“Sovetlər Birliyi bərpa oluna bilməz. Belə ki, həmin birlik ideologiya əsasında yaradılmışdı. Bunu kim bərpa etmək istəsə də, Vladimir Putin etməyəcək”.

D.Sammut sovetlər dönəminin sonunda baş verən qanlı hadisələri xatırlayıb:

“Hər kəs Tiflisdəki 9 aprel, Bakıdakı 20 yanvar və digər hadisələri yaxşı xatırlayır. Bu problemin digər aspekti də var. Məhz Rusiya və bu ölkədəki bəzi dairəslərin hegemonluğu, eləcə də qonşu dövlətlərin müstəqilliyini məhdudlaşdırmaq istəməsidir.  

Bu, artıq baş verib. Və bunun post-sovet dövlətlərində də hər gün şahidi oluruq. Lakin heç kəs Rusiya layihələrinin bir hissəsi olmaq istəmir”.

Ekpert bildirib ki, keçmiş SSR-dəki dövlətlərdən heç biri hadisələrin bu cür axarından razı deyil:

“Rusiya və Belorus arasında olan gərginliyi görmək kifayətdir ki, bu hegemonluq modelini anlayasan. Lakin Moskvada hələ də buna inananlar var. Əgər onlar Trampın simasında ABŞ-dan dəstək alacaqlarına inanırlarsa, yanılırlar”.

Xatırladaq ki. “Sarqrad” telekanalında “Zaxarla çay” (Чай с Захаром)  müəllif proqramında  verdiyi müsahibədə Jirinovski qeyd edib ki, Rusiya ABŞ-ın yeni prezidenti Donald Trampla SSR-i sərhədlərinin bərpası məsələsini razılaşmalıdır:

“Əgər Rusiyanın prezidenti olsaydım deyərdim ki, Donald, gəlin Çin və İran üzrə razılaşaq. Biz tərəfdən SSR-inin sülh yolu ilə sərhədləri bərpa olunacaq. ABŞ isə xarici siyasətində keçmiş sovet respublikalarında baş verənlərə reaksiya verməyəcəyini bəyan edəcək. O ticarətçidir. İstəmir ki, Çin güclənsin, elə biz də istəmirik. Rusiya və ABŞ-ın İranla bağlı maraqları da üst-üstə düşür. Belə ki, İran cənubdan Rusiya üçün təhlükəldir. Rusiya ilə ABŞ-ın münasibətlərinin yaxşılaşması  elə bu dövlətlərin özləri üçün sərfəlidir. Belə ki, hazırda kommunizm təhlükəsi yoxdur”.

1news.az