Əbülfəs Qarayev Mərakeş Krallığı və Yaponiyanın ölkəmizdəki səfirləri ilə görüşüb

Mədəniyyət və turizm naziri Əbülfəs Qarayev Mərakeş Krallığının Azərbaycandakı fövqəladə və səlahiyyətli səfiri Mohamed Adil Embarş və Yaponiyanın fövqəladə və səlahiyyətli səfiri Tsuquo Takahaşini qəbul edib.

1news.az-ın məlumatına görə, M.A.Embarş ilə görüşdə Azərbaycan və Mərakeş arasında mədəniyyət və turizm sahələri üzrə əməkdaşlıq məsələləri müzakirə olunub.

Mədəniyyət və turizm sahələri üzrə müvafiq hüquqi bazanın mövcudluğu iki ölkə arasında əlaqələrin yüksək səviyyədə olmasının göstəricisi və əməkdaşlığın genişləndirilməsinə şərait yaradan faktor kimi qiymətləndirilib.

Nazir tərəfindən Mərakeş Krallığının rəsmilərinə ünvanlanmış cari ilin 5-6 may tarixində Bakı şəhərində 4-cü dəfə təşkil olunacaq Ümumdünya Mədəniyyətlərarası Dialoq Forumunda iştiraka dair dəvət məktubları səfirə təqdim olunub.

Ə.Qarayev ilə Yaponiyanın səfiri Tsuquo Takahaşi arasında isə vida görüşü keçirilib.

Görüşdə Azərbaycan və Yaponiya arasında mədəniyyət və turizm sahələri üzrə əlaqələrin səviyyəsi yüksək qiymətləndirilib.

İki ölkə arasında  sözügedən sahələrdə əməkdaşlığın perspektivləri haqqında fikir mübadiləsi aparılıb və turizm üzrə əməkdaşlığın inkişaf etdirilməsinin əhəmiyyəti vurğulanıb.

Nazir Tsuquo Takahaşinin Yaponiyanın ölkəmizdəki fövqəladə və səlahiyyətli səfiri olaraq fəaliyyət göstərdiyi müddətdə qarşılıqlı əlaqələrdən məmnunluğunu ifadə edib, səfir isə öz növbəsində ölkəmizdə fəaliyyət müddətində iki ölkə arasında əməkdaşlığın inkişaf etdirilməsinə dair əlindən gələni əsirgəmədiyini bildirib.

Sonda nazir Yaponiya rəsmilərinə ünvanlanmış lV Ümumdünya Mədəniyyətlərarası Dialoq Forumunda iştirak barədə dəvət məktublarını səfirə təqdim edib.

1news.az