Zaur Qəhrəmanov: “SOCAR-ın Türkiyədəki layihələrinə xərclənən vəsait 11 milyard dollara çatıb”
“2016-cı ildə SOCAR-ın “Petlim” konteyner limanı, “Petkim” neft-kimya kompleksi, “Star” neft emalı zavodu, “Petkim” külək elektrik stansiyası və TANAP layihələrinə xərclənən vəsait ümumilikdə 11 milyard dollara çatıb”.
1news.az Azərtac-a istinadən xəbər verir ki, bu sözləri “SOCAR Turkey Enerji A.Ş.”nin (STEAŞ) baş direktoru Zaur Qəhrəmanov “Energy Business” jurnalına müsahibəsində deyib.
O bildirib ki, bu layihələr tamamlandıqda ümumi investisiya həcmi təxminən 18 milyard dollar olacaq. “Petkim” neft-kimya kompleksinin özəlləşdirilməsi 2 milyard 40 milyon dollar, satın alındıqdan sonra kompleksə yatırılan investisiya 600 milyon dollardır. TANAP-ın dəyəri 8,5 milyard dollar, “Star” zavodunun 5,7 milyard dollar, “Petlim” konteyner limanının ümumi investisiya dəyəri isə 400 milyon dollardır:
“2016-cı il “SOCAR Turkey” üçün çox uğurlu il olub. TANAP layihəsində böyük məsafə qət edilərək layihənin 60 faizi tamamlanıb. “Petlim” konteyner limanının birinci fazası tamamlanıb, əməliyyatlara başlanıb. Limanın ikinci fazası üzrə işlər isə davam edir. Həmçinin “Star” zavodunun 82 faizi artıq tamamlanıb. “Petkim” külək elektrik stansiyası layihəsi üzrə də böyük həcmdə işlər görülüb. Stansiyanın bu il fəaliyyətə başlaması nəzərdə tutulur”, - deyə Z.Qəhrəmanov əlavə edib.
STEAŞ-ın baş direktoru qeyd edib ki, “Star” neft emalı zavodunun inşaat və mühəndislik işlərinin böyük hissəsi 2017-ci ildə tamamlanacaq. TANAP layihəsində isə ilin sonundan başlayaraq inşaat işlərindən əməliyyat işlərinə keçilməsi planlaşdırılır.
Xatırladaq ki, SOCAR “Petkim”i 2008-ci ildə 2,5 milyard dollara alıb. SOCAR 2008-ci ilin mayından etibarən Türkiyədəki fəaliyyətini “SOCAR Turkey Enerji A.Ş.” (STEAŞ) adı ilə davam etdirir. STEAŞ “Petkim”də təxminən 52,32 faizlik səhmə sahibdir.
1news.az
