Kabildə hərbi hospitala hücum nəticəsində 30-dan çox insan ölüb – YENİLƏNİB

Əfqanıstan təhlükəsizlik qüvvələri saatlarla davam edən atışmadan sonra Kabildə hərbi hospitala hücum edən silahlıların hamısını məhv edib. 

1news.az APA-ya istinadən xəbər verir ki, bu gün səhər saatlarında hospitala 5 silahlı hücum çəkib.

Silahlılardan biri üzərindəki partlayıcı qurğunu işə salaraq hospitalın girişində partlayış törədib. Digər 4 silahlı həkim xələtində hospitala daxil olub.

Əfqanıstan Daxili İşlər Nazirliyi artıq əməliyyatın tam başa çatdığını, hospitaldakı silahlıların hamısının öldürüldüyünü açıqlayıb.

Qeyd edək ki, hospitala hücum nəticəsində 30-dan çox insan ölüb. Hücuma görə məsuliyyəti İŞİD terror təşkilatı öz üzərinə götürüb.

11:58

Əfqanıstanın paytaxtı Kabildə Amerika Səfirliyinin yaxınlığında şiddətli partlayış baş verib.

1news.az APA-ya istinadən xəbər verir ki, Kabildə hərbi hospitala hücum nəticəsində ən azı bir xəstə və bir hospital əməkdaşı ölüb. Hərbi hospitala hücum edənlər ağ həkim xələtində olublar.

Qeyd edək ki, bu gün səhər saatlarında ABŞ səfirliyi yaxınlığında yerləşən hərbi hospitalda əvvəlcə güclü partlayış olub, sonra atışma başlayıb. Yerli mətbuat 4 silahlının hospitala daxil olduğunu, beşinci silahlının hospitalın giriş qapısında üzərindəki partlayıcı qurğunu işə salaraq özünü partlatdığını yazıb.

10:22

Əfqanıstanın paytaxtı Kabildə Amerika Səfirliyinin yaxınlığında şiddətli partlayış baş verib.

1news.az lent.az-a istinadən xəbər verir ki, Kabildə hərbi xəstəxananın önündə törədilən partlayışdan sonra terrorçu xəstəxananın içinə girib.

Hərbçilərlə terrorçu arasında atışma yaşanır.

Qeyd edək ki, 400 nəfərlik xəstəxana ABŞ səfirliyi ilə eyni küçədə və yaxın  məsafədə yerləşir. 

1news.az