Rusiya sərhədçiləri işğal olunmuş Dağlıq Qarabağın “sərhədlərini” qorumaqda ermənilərə kömək edirlər
Rusiyanın Federal Təhlükəsizlik Xidmətinin (FTX) Ermənistandakı sərhəd idarəetmə bölməsi və Ermənistanın sərhəd qoşunları İrandan tanınmamış “Dağlıq Qarabağ Respublikası”na (Azərbaycanın Dağlıq Qarabağ regionunun işğal olunmuş əraziləri) keçməyə cəhd göstərən qanun pozucularının qarşısının alınması üçün birgə ssenari işləyib hazırlayıblar.
1news.az xəbər verir ki, bu barədə Rusiyanın Federal Təhlükəsizlik Şurasının sərhəd idarəetmə xidmətindən məlumat veriblər. Məlumata görə, güc və qüvvələrin uzlaşdırılmasının yüksəldilməsi məqsədilə Rusiya FTX-nin Ermənistandakı sərhəd idarəetmə xidməti və Ermənistanın Milli Təhlükəsizlik Xidmətinin Meqridə yerləşən sərhəd qoşunlarının iştirakı ilə “Atışmaların baş verdiyi istiqamətlərdə sərhəd axtarışlarının aparılması” mövzusunda birgə təlimlər keçirilib.
Təlimlar zamanı Dağlıq Qarabağa (Azərbaycanın Dağlıq Qarabağ regionunun işğal olunmuş əraziləri) daxil olmaq istəyən sərhəd pozucularının axtarılıb tapılması üçün Rusiya və Ermənistan hərbçiləri qarşılıqlı məlumatlandırma qaydası işləyib hazırlayıblar.
“Ermənistan-İran sərhədini keçən iki nəfər şərti sərhəd pozucusu siqnalizasiya kompleks xəttini dəf etdikdən sonra Ermənistan və “DQR”in sərhədini də keçərək dağlıq ərazidə gizlənmək istəyiblər. Axtarışlar nəticəsində sərhədçilər sərhəd pozucularından birini gizlənmək istəyən zaman saxlayıblar. Digər sərhəd pozucusu isə videokamera quraşdırılmış kvadrokopter aparatının köməkliyi ilə ələ keçib”- deyə, məlumatda qeyd olunub.
Qeyd edək ki, 1992-ci il sentyabrın 30-da Yerevanda Rusiya ilə Ermənistan arasında imzalanmış dövlətlərarası sazişə əsasən, Rusiya sərhədçiləri Ermənistan-Türkiyə və Ermənistan-İran sərhədlərində xidmət keçirlər.
Rusiyanın Federal Təhlükəsizlik Xidmətinin (FTX) Ermənistandakı sərhəd idarəetmə xidmətinin Gümrü, Armavir, Artaşat və Meqridə dörd sərhəd bölməsi, eləcə də Yerevan Beynəlxalq Aeroportunda xüsusi nəzarət-keçid məntəqəsi var.
Rusiya sərhədçilərinin Ermənistanda saxlanması üçün xərclər isə tərəfdaşlıq əsasında hər iki dövlət tərəfindən qarşılanır.
1news.az
