Bakıda Misirin milli bayramı qeyd edilib
Bakıda Misirin milli bayramı-İnqilab Günü münasibətilə rəsmi qəbul təşkil edilib.
1news.az xəbər verir ki, tədbirdə çıxış edən Misirin Azərbaycandakı səfiri xanım Suzan Cəmil Nuh inqilabdan ötən illərdə ölkəsinin keçdiyi inkişaf yolundan danışıb. Bildirib ki, bu il Misirlə Azərbaycan arasında diplomatik əlaqələrin qurulmasından 25 il ötür. Qardaşlıq, dostluq prinsipləri üzərində qurulan bu əlaqələr iki ölkənin daim qarşılıqlı dəstəyi ilə davam edib.
Diplomat xüsusi vurğulayıb ki, Azərbaycanın işğal altında olan Dağlıq Qarabağ və ətraf ərazilərinin geri qaytarılmasına və bütün torpaqları üzərində suverenliyinin bərpa edilməsinə yönəlmiş haqlı mövqeyi ilə bağlı BMT və İƏT-in qəbul etdiyi bütün qətnamələrin Misir tərəfindən dəstəklənməsi bunun bariz nümunəsidir.
Suzan Cəmil Nuh bildirib ki, böyük Misir xalqı terrora qarşı mübarizəsində ona dəstək olan bütün dost və sülhsevər ölkələrin fəaliyyətini yüksək qiymətləndirir.
Diplomat Azərbaycan ilə Misir arasında siyasi, iqtisadi, mədəni sahələrdə əlaqələrin inkişaf etdiyini söyləyib. Qarşılıqlı səfərlərin və imzalanmış çoxsaylı sənədlərin əhəmiyyətini vurğulayan səfir, əmin olduğunu bildirib ki, ənənəvi dostluq və əməkdaşlığa söykənən münasibətlər bundan sonra da əlaqələrin möhkəmlənməsinə təkan verəcək.
İqtisadiyyat naziri Şahin Mustafayev Misir xalqını və dövlətini Azərbaycan prezidenti və hökuməti adından təbrik edib. Bildirib ki, ötən 25 ildə iki ölkə dostluğa əsaslanan münasibət qurub. Dövlət başçılarının siyasi iradəsi əsasında ölkələrimiz arasında əməkdaşlıq inkişaf edir. Azərbaycan və Misir həm ikitərəfli, həm də beynəlxalq təşkilatlar çərçivəsində əməkdaşlıq edir.
Nazir Misir dövlətinə Dağlıq Qarabağ münaqişəsində tutduğu ədalətli mövqeyə görə təşəkkür edib. Vurğulayıb ki, iki ölkə arasında 50-dək sənəd imzalanıb. Ş.Mustafayev iqtisadi-ticari sahədə əlaqələrin inkişafının vacibliyinə diqqət çəkib. Onun sözlərinə görə, Azərbaycan-Misir hökümətlərarası komissiyanın dördüncü iclasında bu məsələlər diqqətdən keçiriləcək.
Pərvanə Sultanova
