Bakıda Mərakeşin milli bayramı qeyd edilib
Bakıda Mərakeş Krallığının milli bayramı-Taxt-Tac Günü münasibətilə rəsmi qəbul təşkil edilib.
1news.az xəbər verir ki, qəbulda hökumət rəsmiləri, xarici ölkələrin Azərbaycandakı səfirləri, ictimaiyyət nümayəndələri iştirak ediblər.
Mərakeş Krallığının Azərbaycandakı səfiri Məhəmməd Adil Embarx ötən müddət ərzində ölkəsinin keçdiyi inkişaf yoluna, beynəlxalq aləmdəki mövqeyinə toxunub. Mərakeş iqtisadiyyatının əsas sektorları barədə söz açıb.
Səfir bildirib ki, Azərbaycan və Mərakeş əlaqələri ən yüksək səviyyədədir. Diplomat ölkələrimiz arasında münasibətlərin müxtəlif sahələrdə inkişafına yüksək səviyyəli qarşılıqlı səfərlərin mühüm töhfə verdiyini söyləyib. O deyib ki, həm Azərbaycan, həm də Mərakeş öz regionlarında dözümlülük və multikulturalizm mərkəzləridir. Bu ilin sonunda iki ölkə arasında ikitərəfli əməkdaşlıq üzrə birgə komissiyanın növbəti iclası keçiriləcək. Səfir ölkəsinin Azərbaycanın ərazi bütövlüyü və Dağlıq Qarabağ məsələsində Azərbaycanın mövqeyini, Azərbaycanın da öz növbəsində Qərbi Saxarada mübahisəli ərazi məsələsində Mərakeşi dəstəklədiyini deyib.
Dini Qurumlarla İş üzrə Dövlət Komitəsinin sədri Mübariz Qurbanlı Azərbaycan dövləti və xalqı adından Mərakeş dövlətini və xalqını təbrik edib. İki dövlət arasında dostluq və əməkdaşlığa əsaslanan münasibətlərin olduğunu vurğulayan komitə sədri turizm, kənd təsərrufatı, energetika daxil olmaqla, müxtəlif sahələr üzrə ikitərəfli əməkdaşlığın genişləndiyini vurğulayıb. O, Mərakeşin Dağlıq Qarabağ münaqişəsində Azərbaycanın mövqeyini dəstəkləməsini yüksək qiymətləndirdiyini söyləyib. Ticarət dövriyyəsinin təkcə 2015-ci ildə əvvəlki illərlə müqayisədə 50 dəfə artdığını deyən M.Qurbanlı əlavə edib ki, hər iki ölkə İƏT və digər beynəlxalq təşkilatlar da daxil olmaqla beynəlxalq müstəvidə qarşılıqlı münasibətləri inkişaf etdirir.
Pərvanə Sultanova
