Yoşihide Suqa: Sanksiyalar KXDR-i xarici valyutadan məhrum edəcək

Yaponiya hökumətinin qənaətinə görə, Koreya Xalq Demokratik Respublikasına (KXDR) qarşı beynəlxalq sanksiyaların tam ciddiliyi ilə tətbiqi Pxenyanı xarici valyutadan məhrum edə bilər.

1news.az  xəbər verir ki, bu sözləri Yaponiya Nazirlər Kabinetinin baş katibi Yoşihide Suqa dekabrın 25-də keçirilən mətbuat konfransında deyib.

“Əgər bu ay BMT Təhlükəsizlik Şurasının qəbul etdiyi sanksiyaları əvvəlki tədbirlərlə birləşdirsək, Şimali Koreyanı ixracdan əldə edilən xarici valyuta gəlirlərindən tam məhrum edə bilərik. Təzyiqləri son həddə qədər artırmaq və bununla Şimali Koreyanı xarici siyasətini dəyişməyə məcbur etmək lazımdır”,- deyə baş katib vurğulayıb.

Y.Suqa sanksiyaların tətbiqi üçün Çin və Rusiya ilə əməkdaşlığın zəruriliyini xüsusi qeyd edib.

Xatırladaq ki, Şimali Koreyanın noyabrın 29-da keçirdiyi növbəti qitələrarası ballistik raket sınağına cavab olaraq BMT Təhlükəsizlik Şurası dekabrın 22-də bu ölkəyə qarşı yeni sanksiyaların daha da kəskinləşdirilməsini özündə əks etdirən yeni qətnaməni yekdilliklə qəbul edib. Sənəddə Pxenyana xam neftin və neftemalı məhsullarının göndərilməsinə yeni məhdudiyyətlər qoyulur və bütün dövlətlərdən bu ölkədən olan işçi miqrantların 24 saat ərzində geri göndərilməsi tələb olunur.

Bundan əlavə, qətnamədə Şimali Koreyaya sənaye avadanlığının, ağır texnikanın və nəqliyyat vasitələrinin göndərilməsi qadağan edilir, həmçinin bu ölkənin əsas ixrac məhsullarından imtina nəzərdə tutulur.

1news.az