Elçin Mirzəbəyli: Prezidentin xəbərdarlığı Ermənistanın yeni hakimiyyətinə verilən şansdır

“Ermənistanda və Azərbaycanın işğal altında olan ərazilərində formalaşdırılmış separatçı bölgədə baş verən hadisələr, İrəvandakı kriminal rejim və onun Xankəndindəki oyuncaq törəməsinə qarşı keçirilən kütləvi aksiyalarda səsləndirilən şüarlar, etiraz bəyanatları Azərbaycan Prezidentinin illər ərzində BMT-nin və digər beynəlxalq təşkilatların kürsüsündən səsləndirdiyi fikirlərin etirafıdır”.

Bunu 1news.az-a siyasi şərhçi Elçin Mirzəbəyli dövlət başçısının ötən gün Müqəddəs Ramazan ayı münasibətilə iftar mərasimində çıxışı zamanı səsləndirdiyi fikirlərə münasibət bildirərkən deyib.

O vurğulayıb ki, Prezident İlham Əliyev Ermənistanda uzun illər boyu qanunsuz yollarla hakimiyyətə sahiblənmiş və kütləvi etiraz aksiyaları nəticəsində istefaya məcbur edilmiş hərbi-cinayətkar xuntanın quldur, qaniçən, insanlıq əleyhinə cinayətlər törədən, bəşəri dəyərlərə, qanunun aliliyinə, beynəlxalq hüquqa meydan oxuyan rejimin nəinki azərbaycanlıların, hətta ermənilərin də düşməni olduğunu bəyan edib, dünyanı bu rejimin cinayətkar mahiyyətinə və əməllərinə diqqətlə yanaşmağa çağırıb:

“Amma təəssüf ki, bu cinayətkar rejimin bəlli bir zaman kəsiyində himayə olunması terroru dövlət siyasətinə çevirən, qəddar uşaq qatillərindən ibarət cinayətkar qrupun hakimiyyətinin ömrünün uzanmasına səbəb olub. Bunun ziyanı isə yalnız Azərbaycan torpaqlarının işğaldan azad edilməsi ilə bağlı aparılan danışıqlar prosesinə, regionda davamlı sülhün və əmin amanlığın bərpa olunmasına deyil, həm də erməni xalqına və onun mənafelərinə dəyib. İşğal faktoru üzərindən yürüdülən millitarist siyasət, neofaşizm təbliğatı, qonşu dövlətlərə qarşı ərazi iddialarının, qonşu xalqlara qarşı dözümsüzlüyün təşviqi və yarıtmaz idarəçilik Ermənistanı regionda həyata keçirilən bütün layihələrdən kənarda qoyub, əhalinin ölkədən qaçmasına, yaxud olduqca ağır, məşəqqətli, sosial şərtlər altında yaşamasına zəmin yaradıb. İşğal eyforiyası iflas düşkünlüyü, total depressiya ilə əvəz olunub. Azərbaycanın öz ədalətli mövqeyinə, təbii resurslarına, insan potensialına söykənərək yürütdüyü sabit və uzaqgörən siyasət, cənab Prezidentin də dediyi kimi Ermənistanı iqtisadi, siyasi, nəqliyyat dalanına çevirib. Bu dalandan yeganə çıxış yolu isə işğala son qoyulması, dinc birgəyaşayış qaydalarının mənimsənilməsidir.

Daha öncə də qeyd etdiyim kimi Azərbaycanın işğal edilmiş ərazilərində, Dağlıq Qarabağda formalaşdırılmış separatçı, cinayətkar rejimə qarşı həyata keçirilən etirazlar da buradakı real vəziyyət haqqında Prezident İlham Əliyevin bu günədək səsləndirdiyi fikirlərin təsdiqidir”.

E.Mirzəbəyli əlavə edib ki, Xankəndində etiraz aksiyası keçirən ermənilər qanunsuz silahlı birləşmələrin əlində girov olduqlarını, heç bir hüquqlarının tanınmadıqlarını, zorla hərbi əməliyyatlara cəlb edildiklərini, özlərini həbs düşərgəsində hiss etdiklərini bildirirlər:

“Azərbaycan Prezidenti ən yüksək kürsülərdən dəfələrlə bəyan edib ki, işğal altındakı torpaqlarımızda yaşayan etnik ermənilər İrəvandakı cinayətkar rejimin və onun Xankəndindəki oyuncaq əlaltılarının girovlarıdır. Bu ərazilər beynəlxalq və milli hüququn nəzarətindən kənarda terror qrupları və digər qanunsuz hərbi birləşmələrin təlim mərkəzinə çevrilib. Törədilən cinayətlərin, buraxılan səhvlərin etiraf olunması isə ilk növbədə bütün bunlardan nəticə çıxarılmasına yol açmalıdır. Əgər Ermənistanın yeni hakimiyyəti baş verənlərdən nəticə çıxaracaqsa, ilk növbədə, öz xalqının mənafeyi naminə konstruktiv mövqe sərgiləyəcəksə, şübhəsiz ki, o zaman dayanıqlı sülhə nail olmaq mümkün olacaq. Ermənistanın bir dövlət kimi mövcudluğu Azərbaycandan asılıdır. Çünki regionun iqtisadi inkişafının açarı Azərbaycanın əlindədir. İşğala son qoyularsa, bu qapılar Ermənistanın da üzünə açıla bilər. Əks təqdirdə, Ermənistanı indikindən daha ağır günlər gözləyir. Proseslər son və həlledici mərhələyə qədəm qoyur.

Azərbaycan Prezidentinin regionun inkişafını, təhlükəsizliyini, bütün bölgə xalqlarının rifah içində yaşamasını arzulayan, yürütdüyü siyasətlə bunu əməldə sübuta yetirən bir lider kimi növbəti xəbərdarlığı da bununla bağlıdır. Prezident İlham Əliyevin xəbərdarlığı Ermənistana və onun yeni hakimiyyətinə verilən şansdır. Bu şansdan istifadə etməklə münaqişənin dinc, ağrısız və ədalətli həllinə nail olmaq mümkündür və bu halda Ermənistan bir dövlət kimi mövcudluğunu qoruya, iqtisadiyyatını inkişaf etdirə, erməni xalqının rifahını təmin edə bilər. Əks təqdirdə Azərbaycanın ardıcıl siyasəti, iqtisadi və hərbi gücü, daim artmaqda olan geosiyasi əhəmiyyəti torpaqlarımızın işğaldan azad edilməsi üçün əsas vasitəyə çevriləcək. Bu halda isə Ermənistanı indikindən daha acınacaqlı bir perspektiv gözləyir”. 

1news.az