Misirli qubernator: Azərbaycan beynəlxalq tədbirlərin keçirildiyi mərkəzdir

6-cı Bakı Beynəlxalq Humanitar Forumu çox yüksək səviyyədə təşkil olunub. Burada iki gün ərzində müzakirə edilən mövzular çox aktual və vacibdir.

Bunu 1news.az-a Forumda iştirak edən Misirin Qalyubiya şəhərinin qubernatoru Alaa Abdelhalim Marzouk deyib. 

O bildirib ki, Forumda iştirakçı dövlətlərin sayının çoxluğu da onu göstərir ki, Azərbaycan həqiqətən də çox mühüm bir ölkədir, beynəlxalq tədbirlərin keçirildiyi mərkəzdir:

"Prezident İlham Əliyevin Forumda çıxışı olduqca mühüm və aktual mövzuları əhatə edirdi və bütün iştirakçılar tərəfindən böyük maraqla qarşılandı. Çıxışda xalqlararası əlaqələrin artmasının, inteqrasiyanın vacibliyi vurğulandı. Prezident Dağlıq Qarabağ münaqişəsinə də toxundu və  ərazilərin işğaldan azad ediləcəyini israrla  bildirdi.

Azərbaycanın dövlət başçısı Misir də daxil olmaqla, bütün ölkələrin nümayəndə heyətlərini yüksək səviyyədə qarşıladı. Buna görə təşəkkürümüzü bildiririk".

Misir nümayəndəsi deyib ki, forumun ilk sessiyasının təhsilə həsr edilməsi bu sahəyə verilən əhəmiyyəti göstərir:

"Misirin dövlət başçısı da təhsilə böyük önəm verir və ona görə də 2019- cu il ölkəmizdə  təhsil ili elan edilib. Biz multikultiralizmə də böyük önəm veririk. Çünki bu vasitə ilə müxtəlif dinlər arasında birlik yaradılır. Forumda bütün bu kimi məsələlər diqqətdə oldu. Ümumiyyətlə,  bütün iştirakçılar tədbirin gedişindən razıdırlar".

Qonaq deyib ki, Bakı çox gözəl şəhərdir, burda elə yerlər var ki, ziyarət etdiyi digər şəhərlərdən daha gözəldir: "Azərbaycan xalqı çox gözəl mehriban, qonaqpərvər, mədəni  xalqdır. Heydər Əliyev Mərkəzi yüksək səviyyədə tikilib, həqiqətən də beynəlxalq bir mərkəz rolunu oynayır". 

P.Sultanova