Sarkisyan KTMT baş katibi məsələsində müdaxilə etməli olduğuna dair fikirləri şərh edib
"Ermənistan prezidenti Konstitusiya tərəfindən ona verilmiş səlahiyyət və funksiyalar çərçivəsində öz fəaliyyətini həyata keçirir. Bu sənədə görə xarici siyasət kursunun aparılması baş nazirin üzərinə düşür”.
1news.az erməni mətbuatına istinadla xəbər verir ki, bu barədə Ermənistanın prezident aparatının ictimaiyyətlə əlaqələr şöbəsindən prezident Armen Sarkisyanın KTMT-nin baş katibi məsələsi ətrafındakı vəziyyətə müdaxilə etməli olması barədə səsləndirilən fikirlər şərh edilərkən bildirilib.
Açıqlamada deyilir ki, bununla belə, prezident Sarkisyan xarici siyasət məsələlərini həll etmək üçün öz təcrübəsindən və şəxsi əlaqələrindən istifadə edir. Və bu, prezidentlə baş nazir arasında aparılmış müzakirələrdən sonra baş verir.
Qeyd edək ki, oktyabrın 30-da Ermənistan nümayəndəsi Yuri Xaçaturovun vaxtından əvvəl geri çağırılmasından sonra KTMT baş katibi vəzifəsi boş qalır. Noyabrın 8-də Astanada keçirilmiş KTMT üzvü olan ölkələrin rəhbərlərinin sammitində yeni baş katibin namizədliyi müəyyən edilməyib.
Bu məsələyə dekabrın 6-da Sankt-Peterburqda keçiriləcək təşkilatın sammitində yenidən baxılması razılaşdırılıb. Hazırda KTMT baş katibi vəzifəsini rusiyalı nümayəndə Valeri Semerikov icra edir.
P.Sultanova
