Paşinyan Ermənistanda prezidentlik formasına qayıdışı istisna etmir
Ermənistanın baş naziri vəzifəsini icra edən Nikol Paşinyan ölkədə parlamentdən prezidentlik formasına keçid imkanını istisna etməyib.
1news.az erməni mətbuatına istinadla xəbər verir ki, bu barədə Paşinyan Sisianda "Mənim addımım” blokunun təşviqat kampaniyası zamanı deyib.
"Əgər parlament hökumət formasını prezidentliklə əvəz etmək zərurətinə əmin olsaq, bizi heç nə saxlamayacaq, sizin də razılığınızla bunu edəcəyik", - deyə Paşinyan bildirib.
Onun sözlərinə görə, konstitusiyada "mütləq dəyişdirilməli" olan bəzi maddələr var:
"Konstitusiyamızda qeyd edilir ki, son dörd ildə yalnız Ermənistan vətəndaşı olan və respublikada daimi yaşayan şəxs nazir və ya millət vəkili ola bilər. Əgər millət vəkillərinə belə bir yanaşmaya haqq qazandırılırsa, nazirlərə gəlincə, bu, diasporun potensialını cəlb etməyə imkan vermir”.
2015-ci ildə Ermənistanda konstitusiya islahatları aparılıb, nəticədə prezidentlik formatı parlamentlə əvəz olunub.
P.Sultanova
